¿De qué falen les muyeres de los cuadros de Picasso cuando tán soles? ¿Qué pensaba l’artista malagueñu mentantu pintaba una obra pa sofitar la Güelgona de los mineros asturianos del añu 63? ¿Qué pasa pela cabeza d’una sicaria brasileña qu’afuega n’alcohol les llagues del so alma d’asesina? ¿A quién s’encomendaba’l xeneral napoleónicu que comanda les tropes franceses enantes d’entamar la batalla de la Ponte de Peñaflor, nel conceyu de Candamu?

Pasaxeres de la nueche recueye la meyor narrativa curtia de Francisco Álvarez, ganador de los premios Xosefa Xovellanos y de la Crítica d’Asturies cola so primera novela, Lluvia d’agostu, quiciabes el debú más sorprendente na lliteratura asturiana de los últimos años.

Autor: Francisco Álvarez

Pacp Alvarez

(Xixón, 1970) ye periodista, traductor lliterariu y autor de les obres Patiu de prisión (VTP, 1998), En poques pallabres (Trabe, 1998), Dixebra, cróniques d’un pueblu (L’Aguañaz, 2003), Historia de cinco goles. El Mundial de ‘El Guaje’ (La Cruz de Grado, 2010), Rumbo a la Historia. Navíos emblemáticos de todos los tiempos (Seronda, 2011), La tierra de la libertad. Crónica de los derechos humanos y civiles en el mundo (Seronda, 2012) y Un país llamáu Dixebra. La historia y les lletres de la banda decana del rock n’asturianu (Seronda, 2013).

Tornó al asturianu la novela de Leonardo Sciascia Una historia cenciella (Seronda, 2012), y ye’l traductor al castellán d’autores italianos como Carlo Mazza, Amara Lakhous (Choque de civilizaciones por un ascensor en Piazza Vittorio, Hoja de Lata, 2016), Alberto Prunetii (Amianto, Hoja de Lata, 2020) Marcello Fois (entre otres, Memoria del vacío, Hoja de Lata, 2014, Premiu al Meyor Llibru Italianu Espublizáu n’España esi añu, y Estirpe, Hoja de Lata, 2016, Premiu Llibreter 2017).

Ganó dos vegaes el Premiu Xosefa Xovellanos, el más importante de les lletres asturianes. Cola so primer novela Lluvia d’agostu (Hoja de Lata, 2016) llevó los premios Xosefa Xovellanos y de la Crítica d’Asturies. Pasaxeres de la nueche (Hoja de Lata, 2019) recueye la so meyor narrativa curtia.