Publicado en Dicires

Dicires: «Fueyes»

Les #fueyes (del llatín ‘folia’) son muérganos vexetativos de plantes y árboles en forma de llámina y xeneralmente verde que faen les funciones de fotosíntesis. Como esta de #carbayu, árbol sagráu pa munches cultures europees, incluyendo los romanos, que lu rellacionaben con Xúpiter.

fueya, la: sust. Parte [en forma de llámina y xeneralmente verde de les que tien un árbol, una planta, que fai les funciones de la fotosíntesis]. 2 Conxuntu de partes [en forma de llámina y xeneralmente verdes de les que tien un árbol, una planta]. 3 Llámina [delgada de papel, de metal]. 4 Llámina [de metal con corte d’un cuchiellu, d’una gadaña]. 5 Publicación imprentada [de poques páxines]. 6 Documentu [onde s’anoten datos]. Fueya de control. || Fueya castelar, Hypericum androsaemum, planta [de fueyes grandes y flores pequeñes de color mariello]. || Fueya de cebón, planta [venenosa que crez en terrenos llentos y que, mayada, úsase p’atontar a les truches]. || Fueya (de) el callu, Umbilicus rupestris, caldera, planta [que tien la fueya arredondiao y carnoso]. || Fueya de lléricu, planta [cola que se curen los duviesos]. || Fueya de sal de figuera, planta [cola que se faen preparaos purgantes]. || Fueya de sapu, planta [con flores marielles de cinco pétalos que tien el megollu asemeyao al xabugu]. || Fueya (del) carril, Plantago lanceolata, planta [de fueyes llargues y estreches con una vara que naz del centru la planta]. 2 Plantago major, planta [a la que-y nacen les fueyes faciendo rosetón y agarren color morao]. || Fueya del llantén, planta del xéneru Plantago [que medra en sitios llentos y que tien fueyes grandes]. || Fueya la castellana, Hypericum androsaemum, planta [de fueyes grandes y flores pequeñes de color mariello]. || Fueya la cortadura, Sempervivum cantabricum, planta [de fueyes carnoses de color verde y la pica arrosada, que salen apiñaes]. 2 Chelidonium majus, cirigüeña, planta melecinable [de flores pequeñes y marielles]. || Fueya la cortonada, Sempervivum montanum, planta [coles fueyes faciendo roseta y les flores arrosaes]. || Fueya la culiebra, Arum italicum, planta [cola flor en forma d’espiga mariella y una envolvedura de color blanco que la arrodia]. || Fueya la llera, Tussilago farfara, planta [de flores marielles que-y salen primero que les fueyes]. || Fueya la nube, Stachys germanica, planta [col tueru enllenu llanuxu y les fueyes de color verde ablancazao]. || Fueya la oropesa, Tussilago farfara, planta [de flores marielles que-y salen primero que les fueyes]. || Fueya la plata, Lunaria annua, planta [de fueyes en forma de corazón y flores púrpures]. || Fueya la serpentina, Acanthus mollis, planta [de fueyes llargues, rizaes y espinoses]. || Fueya l’algodón, Stachys germanica, planta [col tueru enllenu llanuxu y les fueyes de color verde ablancazao]. || Fueya sanxuanera, [tipu de] fueya comestible [que se cría per San Xuan]. || Fueya’l bregón, Iris foetidissima, planta [con flores grandes de color morao]. || Fueya’l francu, Hypericum androsaemum, planta [de fueyes grandes y flores pequeñes de color mariello]. || Fueya’l zubón, Scrophularia auriculata, planta [col tallu güecu y les flores acolorazaes]. || Fueyes de xabón, planta [venenosa que crez en terrenos llentos y que, mayada, úsase p’atontar a les truches]. || Furar la fueya, cantar bien, tener bona voz. || Venir la fueya al muriáu, fam. cumplise [a daquién] daqué que nagua.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *