Publicado en Asturies.com, Festivales

La composición ‘Tierra’ llevó los soníos d’Asturies al corazón d’An Oriant

 

La Orchestre National de Bretagne protagonizó esti llunes nel Espace Marine del Festival Interceltique de Lorient ún de les cites especiales de la cincuentena edición, el conciertu ‘Finisterres celtiques’ énte más de 2.000 persones. Ramón Prada compunxo un movimientu, ‘Tierra’, pal que contó cola collaboración na intepretación d’Ambás, Ramsés Ilesies y Hevia.

‘Finisterres celtiques’ yera un encargu de la organización con motivu de los cincuenta años de festival, que finalmente se tuvo que retrasar a 2021. Xunto a Prada, llamóse a Frédérique Lory (Breizh), Paul Leonard Morgan (Alba), Sir Karl Jenkins (Cymru) y Bill Whelan (Éire) pa la composición d’un movimientu caún, independientes, pero con unes indicaciones comunes por parte de la organización.

“Anque diferentes, víase un filu de conexón intercéltica ente les pieces”, rellató Iñaki Santianes, responsable de la delegación asturiana nel festival bretón. Prada llevó a An Oriant ‘Tierra’, una composición que fixo viaxar a Asturies a los presentes nel Espace Marine.

Pa ello contó cola collaboración de Xosé Antón Fernández ‘Ambás’, primer voz masculina nuna obra del cangués; de Ramsés Ilesies, que tocó la pandereta y dos instrumentos creaos pol compositor qu’asemeyaben el soníu d’un tetu al catar y el del mayáu; y la gaita de José Ángel Hevia, nuna interpretación d’un dificultá téunica importante. Xunto a ellos, el músicu gallegu Abraham Cupeiro col carnyx.

Prada y tolos intérpretes de ‘Tierra’ recibieron l’aplausu d’un públicu que marchó encantáu pa casa llueu d’un conciertu de dos hores y media de músiques diferentes procedentes de cinco naciones celtes que beben d’una fonte común. Una cita única que que queda como’l gran recuerdu de la conmemoración de los 50 años del Festival Interceltique de Lorient.

Felpeyu y Muga’l sábadu

El sábadu Asturies va tornar a ser protagonista n’An Oriant. Felpeyu va tocar a les 20 hores nel espaciu La Bretagne Invite xunto coles bandes bretones Les Vrillés y el dúu Chaveul/Noguet, que convida pa la ocasión a Roland Coq.

Enantes, a les 14 hores nel mesmu escenariu, el tríu asturbretón Muga va repetir nel certame, nesta ocasión xunto coles bandes Zoñj y Lune Bleue Trio.

Na semeya, un momentu de la interpretación de ‘Tierra’ nel Espace Marine, con Hevia cola gaita en pantalla xunto a Cupeiro.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *