Güei queremos davos anuncia de la publicación de la versión dixital de la Guía Didáutica de ‘Xixón, una ciudá abierta a la mar’
- Enllaz https://xixonylamar.xixon.es/ Genial.ly
Trátase d’una publicación que complementa y quier valir d’encontu al profesoráu al tiempu de preparar y desarrollar l’actividá que lleva esti mesmu nome y na que neñes y neños de cuartu de primaria descubren distintos llugares d’esta ciudá que mira pal Cantábricu y arreciende a salitre.
Nun hai qu’escaecer que pela mar aportaron civilizaciones nueves qu’arriquecieron y conformaron la nuestra historia d’anguaño y que la mar foi, amás, sustentu y alimentu demientres bien de tiempu pa munches families d’esta villa; pela mar partieron y arribaron xentes buscando esperiencies nueves o una vida meyor.
Tolos llugares polos qu’escolines y escolinos pasen nesta actividá apaecen nomaos na Guía dixitalizada: La Escalerona, Cimavilla, les termes romanes, el muelle, la rula y xunto con Pelayo, Xovellanos y les cigarreres, ente otros, van apurrir cachones d’entretenimientu y marees d’información pa completar el cuadernu de viaxe 2.0. per esta villa mariniega.
Como ye persabío, el patrimoniu que contién la ciudá ye una ferramienta fundamental pa la educación en valores, y p’amosar les señes d’identidá qu’han ser arguyu de les y los xixoneses y de les persones qu’habiten esta ciudá.