El primer salmón de la temporada n’Asturies, el campanu’, foi vendíu esti domingu al restorán El Rincón Asturianu, de Madrid, por un preciu de 19.300 euros. Trátase d’una cifra récord de puya.
- Fonte: / videu /
El campanu d’esta temporada foi prindáu pol pescador Gonzalo Díaz Sotu a les 8.20 de la mañana d’esti domingu 14 d’abril nel ríu Narcea. El pexe pesó 8 quilos 200 gramos y prindóse nel ríu Narcea nel cotu de Ponte Laneo.
La localidá de Cornellana, en Salas, acoyó la tradicional puya del Campanu d’Asturies, nel marcu de la feria Asturpesca-Capenastur y coincidiendo col entamu de la campaña de pesca con muerte esti domingu.
Trenta y tres pescadores participaron el domingu, a primer hora, nel sortéu de les veces del Pozu de la Ponte Romana, nel ríu Sella, nengunu de los qu’utilizó la so media hora de pesca –dalgunos fueron y nun esperaron a que los tocara– consiguió pescar nada, como-yos asocedió al restu de pescadores qu’ese primer día de la temporada de salmón (con muerte) probaron fortuna nos llances del Sella.
El domingu salieron dos salmones, unu nel Narcea, el Campanu d’Asturies (8,210 quilos, 19.300 euros na puya) y otru nel Cares (6,5 quilos, nun se vendió). El llunes ye día inhábil y nun se pesca, asina que güei martes, dende bien temprano, nes veres del Sella yá había decenes de pescadores.
