Xorda: ‘xunta de vecinos para charrar y entretenese,
que se faía dempués d’acabar el trabayu’.
La xorda. Nuevos cantares de chigre, ye una renovación de los antiguos cancioneros para cantar nos chigres y sidreríes preparada pol músicu y ganador del Premiu Nacional de Músiques Actuales 2023 Rodrigo Cuevas. El llibru contien una compilación de cantares vieyos y nueves, según una serie de comentarios fecha por Rodrigo Cueves y l’escritor Xaime Martínez, que nos emponen al traviés d’una nueche de francachela sicalíptica.
Xorda ye una palabra asturiana que significa ‘xunta de vecinos para charrar y entretenese, que se faía dempués d’acabar el trabayu’. Esti llibru, asina, reflexa’l patrimoniu musical popular al empar que lo proxecta escontra’l futuru, y demuestra el potencial emancipador y revolucionario que tienen esa xorda. Demuestra, d’últimes, qu’equí inda puede cantase. Los cantares van acompañaes d’una serie d’ilustraciones feches por mozos ilustradores asturianos, qu’amplíen la significación de los testos.
Semeyes: Pablo Roces Albalá
