NUBERU, Deira band, La Garrapiella, Guieldu, Llevólu’l Sumiciu, LA BONTURNÉ, Alicia Álvarez, Ún de Grao Trío y Muyeres van tocar en Xixón ente’l 30 de xunetu y el 4 d’agostu na IX edición del Festival Arcu Atlánticu entamáu por Cultura Gijón / Xixón.
- Fonte:musicasturiana.com
Güei presentóse’l IX Festival Arcu Atlánticu, que torna a celebrase en Xixón dempués de la so cabera edición en 2019. La programación va desendolcase ente’l martes 30 de xunetu y el domingu 4 d’agostu, y cunta con conciertos, espectáculos de danza y teatru, talleres, instalaciones y esposiciones artístiques, charres, cine y la celebración del Día d’Asturies en Xixón con un gran desfile de bandes de gaites y grupos de baille tradicional -domingu 4-. El barriu de Cimavilla, el Centru de Cultura Antiguu Institutu, la Escuela de Comerciu y los Xardinos de la Reina van ser los principales escenarios del eventu. Toles actividaes y conciertos son de baldre.
La música’l país protagoniza la estaya de conciertos del festival. Ente’l miércoles 31 y el sábadu 3 va poder esfrutase de los sones de nueve proyectos asturianos de folk, electrónica, música tradicional, asturianada y canción d’autor. El miércoles 31 a les 13.30h toca’l tríu Deira na Plaza Xovellanos de Cimavilla y, a les 20.30h, va sonar Nuberu nel Muséu del Pueblu d’Asturies. La bandina La Garrapiella va amenizar les cais de Cimavilla con un pasucáis, el miércoles 31 a les 13.30h. El conciertu de Guieldu ye’l mesmu día a les 20.30h nel CCAI.
Nel CCAi tamién van actuar La Bonturné al día siguiente –vienres 2-, a les 20.30h. Llevólu’l Sumiciu completa los conciertos del vienres 2 a les 19h na Plaza La Corrada de Cimavilla. La reciella va poder esfrutar del espectáculu Pulgarina d’Alicia Álvarez el sábadu 3 a les 13.30h na Plaza Xovellanos de Cimavilla. Ellí van tocar tamién Ún de Grao Trío -José Martínez, Horacio García y César Latorre- a les 19h. El CCAI zarra la programación del sábadu 3 a les 20.30h con Humanes, del colectivu de música tradicional Muyeres.
Conciertos internacionales y otres actividaes
El primer conciertu d’esta edición del Festival Arcu Atlánticu ye’l martes 30 a les 19h nel CCAI y cuerre a cargo del colectivu Tradição Contemporánea de música tradicional de Beira Baixa (Portugal). El mesmu día toquen Tanxugueiras (Galiza) na Plaza Mayor a les 22h. Tamién del país vecín, la compostelana Antía Muiño actúa’l sábadu 3 a les 19.30h na Colexata de San Juan Bautista de Cimavilla. Amás, les compañíes vasques de danza Kukai Danza y Harrobi Dantza Bertikala van ufrir dellos espectáculos.
Amás de música y danza, el festival organiza’l ciclu Arcu de Cine con producciones audiovisuales d’Asturies y otros países del arcu atlánticu. Destaca la proyección del documental de Pablo A. Quiroga Prendes Llumeres. Mina y vida a la mar (2023) nel salón d’actos de la Escuela de Comerciu el miércoles 31 a les 19.30h. La xente va poder participar tamién de gran variedá de talleres rellacionaos cola cultura asturiana: cestería, indumentaria tradicional, telar participativu, dances populares de dellos países, y cerámica tradicional cola Alfarería de Faro, ente otros. La esposición Facer territoriu atando cabos, resultáu de la investigación artística d’Irene Trapote sobre l’oficiu de les rederes va tar disponible dende’l miércoles 31 hasta la fin del festival na Sala 1 del CCAI. La programación completa pue consultase equí.
