Marina quier escapar de Perendi. L’ansia d’esperiencies de la mocedá, el brillu del gran mundu y un futuru idealizáu d’ésitos profesionales llámenla alantrones, embúrrienla pa dexar atrás el valle natal. Pero, enantes de marchar, tien que buscar, xusto en Perendi, la materia pal trabayu d’investigación que-y facilite acceder a una plaza d’investigadora asociada na Universidá de Wisconsin: la obra pictórica d’un estrambóticu artista siriu inmigráu nel conceyu, dotáu del don de la profecía pictórica y augur de defunciones y catástrofes. Pelos cuadros d’Ahmad Rami desfila una sociedá semirrural decadente que, como caún de los sos componentes, muerre d’una manera tan irremediable como ridícula.
La obra ye una adaptación escénica d’una parte de los relatos publicaos por Milio Rodríguez Cueto, nel diariu La Nueva España, ente los años 2000 y 2010, recoyíos posteriormente en tres volúmenes de cuentos. Supón el debú nes tables d´ún de los autores contemporáneos mas premiaos d´Asturies y una de les plumes mas orixinales de la lliteratura n´asturiano y castellán.
El pintor Nacho Suárez pintó hasta siete cuadros orixinales a costafecha pa PERENDI, onde tamién contamos cola colaboración de Lidia Otón, una de les actrices habituales del Teatro de La Abadía de Madrid dende los años 90, especialista en coaching y dirección actoral.
