- Fonte: MusicAsturiana.com / Facebook / LINK /
El grupu folk Llan de Cubel ye la segunda incorporación a la estaya de playlists en Spotify dedicaes a los artistes más pernomaos de la música’l país 
Siéntila nel nuesu perfil.
Musicasturiana.com entamó’l mes pasáu una nueva estaya de playlists nel so perfil de Spotify. Inspirándose nes This Is: que la plataforma musical sueca dedica a artistes de renome, Musicasturiana.com fai lo propio centrándose nos cantares de los grupos más destacaos de la música’l país. Esto ye: Dixebra foi la primer incorporación. Güei, aprovechando los 40 años d’historia y la so participación na 40 Noite Celta de Pocía, continuamos la sección con Esto ye: Llan de Cubel, una llista de reproducción qu’axunta 30 cantares del grupu con más historia del folk asturianu.
La escoyeta musical d’estes playlists nun respuenden namás a criterios algorítmicos o a los temes más populares de cada formación. Un exemplu d’ello son les más de dos hores de música que suena n’Esto ye: Llan de Cubel y qu’axunta cantares de tola discografía del grupu, rareces, temes perconocíos y otros que nun suenen nos directos d’esta formación, pero que tienen una calidá bultable. La playlist ye una amuesa de la so visión de la música tradicional asturiana, tamién con presencia de melodíes pal baille, y los temes compuestos pol grupu, mesmo intrumentales que vocales, con soníos y lletres nes que resuena siempre la identidá y memoria d’Asturies de dalguna manera.
Llan de Cubel: 40 años de folk asturianu
Llan de Cubel ye, ensin duldes, ún de los grupos más importantes de la escena musical asturiana. Formaos en 1984 por músicos d’Uviéu y Cuideiru, diéron-y al folk asturianu una sonoridá particular y prestixu internacional, afitando unes bases a la hora de reellaborar la música tradicional qu’influiría a una montonera bandes. Tocaron en más venti países de tol mundu, xubieron a los escenarios de los festivales más reputaos del xéneru y espublizaron seis discos: Deva (1987), Na Llende (1990), L’Otru Llau de la Mar (1992), IV (1995), Un Tiempu Meyor (1999) y La lluz encesa (2019).
Amás d’ayudar a recuperar, dignificar y visibilizar la tradición sonora del país, con especial predilección poles ayalgues de los cancioneros de finales del sieglu XIX y entamos del XX, tamién compusieron temes propios. Lleven 40 años enriba los escenarios divulgando y revitalizando la cultura asturiana tocando per tolos requexos del país, dexando tres de sí una buelga de tradición, emotividá, memoria y vitalidá.
