Los directores xenerales d’Axenda 2030 y Consumu, Juan Ponte (centru) y Faustino Zapico (izquierda), visiten el Muséu del Ferrocarril. A la derecha el director del Muséu Javier Fernández.
El director xeneral d’Axenda 2030, Juan Ponte, anunció esta mañana que’l Gobiernu del Principáu quier desenvolver a finales d’anguaño una campaña divulgativa na nuesa comunidá pa promocionar l’usu del tresporte públicu.
En concretu, Ponte avanzó que la intención ye la de facilitar la movilidá sostenible ente tola población asturiana al traviés del usu del tren de cercaníes. “El tresporte del futuru yá esiste, y llámase ferrocarril”, manifestó.
L’oxetivu d’esta campaña ye llograr amenorgar les emisiones de dióxidu de carbonu (CO2) y, poro, la contaminación a la que se ve sometida la nuesa rexón, al empar qu’ameyora la vertebración de too el territoriu y la cohesión social. “Lo que cohesiona socialmente y vertebra territorialmente son les cercaníes”, esplicó Juan Ponte.
El director quixo recordar que, dientro de los Oxetivos de Desenvolvimientu Sostenible (ODS) fitos na Axenda 2030 de Nacionales Xuníes, el númberu 11 fai referencia a la creación de ciudaes y comunidaes sostenibles. Nesti sentíu, citó l’exemplu del Reinu Uníu, qu’apostó por que’l sistema de ferrocarril vuelva ser xestionáu pola Alministración pública cola so renacionalización.
“Más allá de les ventayes qu’ufierta l’alta velocidá, nun se trata namá de realizar obres de caltenimientu o de meyora de los medios de tresporte, sinón que tendríamos de tener un plan estratéxicu de sostenibilidá. Esti plan pasa pol tresporte públicu más eficiente y sostenible, que ye’l ferrocarril”, puntualizó.
