Yá ta en toles plataformes musicales y a la venta na tienda online de Musicasturiana.com La Banda… Latira!, el primer trabayu discográficu de la formación astur-bretona del mesmu nome. Dempués d’asoleyar el single “Le voyage rêvé” y algamar l’oxetivu de financiación del crowdfunding qu’entamaron pa cubrir los costes de producción, diseñu y fabricación, el quintetu abre una nueva etapa na so andadura musical cola publicación d’esti álbum. Grabáu ente Tutu Estudios y Bretaña, n’él pueden sentise 11 temes qu’entemecen les músiques tradicionales d’Asturies y Bretaña cola composición propia.
«El repertoriu d’esti primer trabayu espeya perbién lo que pue sentise nuna actuación de La Banda Latira. Amiestos de melodíes tradicionales, mesmo asturianes como bretones, arreglaes con tratamientos armónicos propios d’estilos actuales, que van dende la música llatina al rock, d’Europa del este, pasando pel funky o l’afrobeat», desplica esta bandina formada por Diego C. Camiña (percusiones y voz), Floriane Legros (curdión y voz), Rodrigo Joglar (gaita asturiana y voz), Marta González (percusiones y voz) y Nicolas Radin (saxofón barítonu, voz y direición artística).
Los temes enérxicos y folixeros de raigañu que dan forma al discu son composiciones y arreglos del propiu Nicolas Radin y Morgane Labbe, la primer cantante y curdionera de la banda, a la que convidaron a collaborar. Per otru llau, Sila Herrera foi la encargada de diseñar la imaxe visual d’un proyeutu onde’l componente estéticu xuega tamién un papel bien importante, como cunta la formación nuna entrevista publicada en musicasturiana.com va unos díes.
Xira de presentación
Con esti discu publicáu, dempués de llevar 13 años tocando per cais y escenarios de toa Asturies y Bretaña, La Banda Latira entama la xira de presentación del álbum. Pel momentu tienen ocho feches confirmaes n’agostu, ente les que destaca la presencia nel Festival Intercélticu de Lorient, con tres actuaciones. Nestos shows van espellar la so filosofía d’interculturalidá, folixa y apueste pola cultura popular.
