- Fonte: El Comercio / El Diario /
Una perdió una aleta por culpa de la presencia de plásticos na agua y otra, un güeyu. Van ser reintegraes al so mediu natural. Yá dafechu recuperaes, llegó’l momentu de que vuelvan al mar. De lliberales. La tortúa boba qu’a principios de 2023 estrenó les instalaciones del Centru de Recuperación d’Animales Marinos d’Asturies (CRAMA), allugáu nel Acuariu, y la que llegó fai unos pocos meses «tán llistes para ser reintroducíes nel so mediu natural».
El martes van abandonar el tanque onde se recuperaron estos últimos meses pa, a bordu d’una embarcación de la Dirección Xeneral de Pesca del Principáu d’Asturies, ser llevaes a delles milles de la mariña, onde van ser soltaes. Pa la so lliberación, pensóse en «una zona segura, llueñe de los peligros de la mariña, como los anzuelos de pesca o les embarcaciones». Tou ta llistu pa la so lliberación, que se va llevar a cabu si les condiciones meteorolóxiques dexen y con una temperatura de l’agua que s’espera tea ente 19 y 20 graos.
La suelta non solo va marcar la torna de les tortúes al mar. El CRAMA pretende que tenga tamién un componente educativu y de sensibilización.
Espaciu informativu. Asina, nel Muelle de Tránsitu, al pie de les oficines del Puertu Deportivu, va instalase un espaciu informativu –que va cuntar con una mesa con material educativo y va tar atendíu por personal d’Educación del Bioparc Acuariu de Xixón– empobináu a neños, families y cualesquier comenenciudu n’aprender sobro’l caltenimientu de les tortúes marines y los peligros acomuñaos a la contaminación plástica. L’oxetivu ye consiguir que cada vez más xente arréyese viviegamente na preservación del mediu ambiente marín.
Precisamente, la presencia de plásticos nel mar foi lo que llevó a la primer tortúa, l’atopada en Bañugues, a les instalaciones del CRAMA. Cuando foi rescatada atoparonla en condiciones crítiques, con una aleta esgañada por plásticos y con presencia de restos plásticos nel so estómagu. A la fin, hubo que toye-y l’aleta estropiada. La so recuperación foi aballadora, rigorosa y lenta, dáu’l so estáu. Pero les pruebes de natación en fondura a les que se-y sometió demuestren que ta llista pa volver al mar.
Tresmisor. El llunes, un día antes de la suelta, va asitiáse-y un tresmisor que va ayudar a realiza-y un siguimientu más refechu. Según espliquen fontes del CRAMA, ta descritu qu’estos individuos, inclusive con trés aletes, pueden sobrevivir nel mediu marín, pero dende’l Centru de Recuperación «pretende tenese más datos nesti sentíu y monitorear la so adaptación».
La segunda tortúa que va ser lliberada, un exemplar xuvenil, foi atopada nel puertu de Llastres va unos meses. Llegó a les instalaciones de Xixón ensin un güeyu, mancaes nes aletes y plásticos nel estómagu, amás d’una neumonía. La intervención del equipu del CRAMA, col sofitu del personal de Bioparc Acuariu, foi crucial pa la so rápida recuperación.
Al CRAMA llegó anguaño una tercer tortúa que, magar los esfuerzos del personal, nun consiguió sobrevivir.
Les Caretta caretta son les tortúes marines más pequenes y abondoses nel mar Mediterráneu, anque podríen algamar los 120 cm de llargor y 120 quilos de pesu. Gusten de les agües non demasiáu fríes, por eso son vistes na práctica totalidá d’océanos y mares templaos del planeta. Asina, dependiendo del so ciclu de vida, podemos atopales en mar abiertu, zones pocu fondes, costeres, badees o estuarios.
