Vero Rubio asoleya la pieza audiovisual del tema col qu’algamó el XV Premiu Camaretá

El pasáu payares Vero Rubio algamó’l XV Premiu Camaretá al Meyor Cantar con “Dixo miou padre“. Como parte del premiu, la Conseyería de Cultura, Política Llingüística y Deporte fízose cargu de la producción d’un videoclip asoleyáu la selmana pasada. La parroquia de Noceda (Cangas del Narcea) ye l’escenariu d’esta obra audiovisual de Juan A. García y De La Piedra Producciones. Amás de Vero Rubio, nel cantar participen Miguel García -violín-, Mónica Jivanescu -viola- y Javier San Marcos -violonchelu-. Andy da Silva foi l’encargáu de la mezcla y asistencia técnica, mientres que Miguel R. Monteavaro -que ta acabante d’algamar el XXX Premiu Xuan María Acebal de Poesía- fizo la revisión llingüística.

Vero Rubio entamó’l so proyectu musical en solitariu col proyectu Vou, al qu’acompañó una xira qu’entamó n’abril con delles feches a lo llargo’l territoriu asturianu y que completó cola so participación nel circuitu Autores nel Camín qu’entama la Dirección Xeneral de Política Llingüística. Ye una multiinstrumentista que toca’l pianu, la trompeta, la trompa y el bodhram. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso, Nacasa Trío (con Tania Pereira y Rita Ojanguren)… Amás, compaxina esti llabor como instrumentista cola composición y producción de la so música de manera independiente. Tien tres cantares en solitario publicaos en plataformes musicales: “Vou caminando“, “Vou cantar” y “Dixo miou padre“.