- Fonte: LNE / Félix Vallina / El Comercio /
- «Esfrutái del momentu y que naide vos ponga llendes».
- «Tenéis qu’esfrutar siempres del equí y del agora. La vida ye urxente»
«Capi» y la so esposa, Tere Pérez.
El exatleta y profesor afectáu pola ELA emociona a los neños del colexu Carmen Ruiz-Tilve. José Luis Capitán volvió demostrar ayeri en La Corredoria que sigue siendo un maestru dando llecciones de vida, superación y esperanza. «Capi», reconocíu exatleta afectáu pola ELA , tornó al colexu Carme Ruiz-Tilve, onde va unos años exerció como profesor, pa fala-yos a los alumnos de la so enfermedá neurodexenerativa y p’animalos a «esfrutar a tope del día ente día» mientres una emotiva charra na qu’a munchos de los presentes, profesores y neños, escapóse-yos dalguna qu’otra llárima pola emoción.
Sobre estes llínees, el exatleta y profesor posa colos alumnos qu’asistieron a la so charra na sala polivalente del colexu. |
José Luis Capitán, ayeri, colos alumnos más pequenos del colexu Carmen Ruiz-Tilve, en La Corredoria.
La charra d’ayeri forma parte del proyectu «EnamoradosdELAvida», una iniciativa educativa qu’empezó’l pasáu 8 d’ochobre nel colexu públicu José Luis Capitán (Cualloto) –que lleva’l nome del protagonista de les conferencies– y que se va repitir en distintos centros educativos de la rexón a lo llargo d’esti cursu.
La intención de «Capi» nun ye otra que «trabayar la frustración y la xestión de les emociones» de los neños y los adolescentes, encarando col mayor optimismu posible la so cruel enfermedá. «Intento faelo mirando siempres escontra alantre con una sorrisa y esfrutando al máximu de la vida, que con too y con eso ye maraviyosa», esplica’l exatleta, que lleva diez años apostando una dura carrera de fondu contra la ELA. «Dar estes charres faime sentir vivu y útil», añede.
José Luis Capitán axuntose na sala polivalente del Carmen Ruiz-Tilve colos neños de sestu cursu, que son los mayores del centru y tienen dolce años. «Poder volver a les aules ye bien emocionante pa mi. Nun pretendo más que falavos de la vida que me tocó vivir, una vida que se topetó contra l’adversidá y que me sirvió pa dame cuenta de que tar arrodiáu de seres queríos ye la meyor receta pa cualquier contratiempu col que podáis atopar», esplicó aprofiando «les agalles» de los sos trés fíos y de la so muyer, Tere Pérez, qu’ayeri tamién tuvo en La Corredoria y nun lo dexa nin a sol nin a solombra. «Tenéis qu’esfrutar siempres del equí y del agora. La vida ye urxente», repitiólos «Capi» a los neños con insistencia.
Llección de vida de «Capi» en La Corredoria
El protagonista cuntó-yos a los neños cualos fueron los primeros síntomes de la so enfermedá. Esplicólos que tando nel so pueblu de Salamanca notó que-y costaba cortar un filete. Diba un tiempu qu’empezara a tocar la gaita, pero al perder fuerza na mano tuvo que dexalo. «Primero desconectóse’l brazu esquierdu, dempués la pierna y tou foi avanzando hasta llegar a la situación na que toi. Agora namá puedo mover los güeyos, daqué que siquier me dexa interactuar col sistema qu’uso pa comunicame y falar con vós. Había dos opciones: ablayame y fundime o aceptar la enfermedá y siguir alantre», rellató «Capi» n’unu de los momentos más emotivos de la so charra. Él decidió siguir alantre. Y eso púdose comprobar nos vídeos que los punxo a los neños. Enseñólos cómo volvió xubir al Angliru ayudáu polos sos amigos –entá caltien el récord d’esa xubida dende 2005, cuando inda corría–, el so ascensu a la Peña de Francia (Salamanca) o munches de les sos iniciatives en pos de recaldar fondos pa la llucha contra la ELA. «Sigo siendo’l capitán d’esti cuerpu fechu cachos. Nun esiste’l fracasu y nunca voi baxar los brazos», aseguró «Capi».
La sensibilidá de 700 voces con José Luis Capitán, enfermu d’ELA. Los alumnos del colexu homenaxen a José Luis Capitán, bandera na llucha contra la ELA.
‘Capi’, una de les cares visibles n’Asturies de la Esclerosis Llateral Amiotrófica (ELA), una cruel enfermedá dexenerativa qu’a día de güei nun tien cura y para la que reclama mayor sofitu institucional ya investigación cola esperanza de que daquién «dea cola tecla» de la cura.
Los chavales pudieron escuchar a José Luis Capitán al traviés del módulu que tien para traducir en palabres la so mirada y notaron de primera esquito la complexidá que la enfermedá y el coraxe de ‘Capi’ y la so esposa para encarar los problema de movilidá, llinguaxe, motricidá qu’adulces van consumiendo al docente y corredor qu’entá caltien el récord de la xubida al Angliru a cuerpu.
