Güei, 24 d’ochobre, conmemórase’l #DíaDeLesBiblioteques colos lemes “Una ventana abierta al mundu” y “Por un futuru sostenible», que destaquen el papel fundamental que desempeñen les biblioteques na consecución de los #ODS de l’Axenda 2030
El Principáu inaugura la esposición Bosque de Letras del artista Fernando Menéndez pa festexar el Día de les Biblioteques
- La muestra, que s’abre mañana n’Uviéu, va tar acompañada d’un programa d’actos culturales bien completu
- Cultura destaca’l valir d’estos espacios públicos como vertebradores d’Asturies y dinamizadores de la vida social
La Conseyería de Cultura, Política Llingüística y Deporte va inaugurar mañana la esposición Bosque de Letras pa conmemorar el Día de les Biblioteques. L’actu oficial d’apertura va ser a partir de la una de la tarde con entrada llibre. La muestra va siguir na capital asturiana hasta’l 9 d’avientu y depués va treslladase a la Biblioteca Xovellanos de Xixón, onde va tar hasta’l 19 de xineru.
Amás d’esta iniciativa, la Rede de Biblioteques Públiques del Principáu d’Asturies preparó una programación cultural percompleta que pue consultase en https://acortar.link/Uk7Ne2
D’esta manera, la conseyería quier poner en valor les biblioteques como espacios públicos que vertebren Asturies y que garanticen el derechu universal a la cultura. Amás, dinamicen la vida social y vuélvense pegollos fundamentales de la sociedá, onde confluyen y se faciliten dellos servicios básicos y imprescindibles.
Cultura destaca que les biblioteques y los sos trabayadores son fundamentales pa garantizar el bienestar, porque cola so dedicación y compromisu ayuden a ameyorar la calidá de vida, xenerando una sociedá más llibre y con meyores ferramientes pa encarar el mundu.
La esposición Bosque de Letras recueye más de 120 manuscritos realizaos pol poeta y grafista Fernando Menéndez. Los más d’ellos son de la so propia creación, anque en determinaos casos usa poemes o aforismos d’otros autores, y tán realizaos sobre cuadernos en dellos materiales y illuminaos con grafíes, colores y motivos de calter artísticu, anque la base son los sos poemes, haikus y aforismos. El montaxe espositivu recrea una especie de taller onde l’autor espón los materiales, pinceles, papeles y pintures qu’usa pa les sos obres.
Fernando Menéndez (Mieres del Camín, 1953) ye poeta y aforista. Llicenciáu con grau en Filosofía Pura pola Universidá de Salamanca, foi profesor de Filosofía. Anguaño ta xubiláu y tien una serie amplia de llibros manuscritos y ilustraos.
Día de les Biblioteques, una ventana abierta al mundu
Desde 1997 y cada 24 d’ochobre celébrase en dellos países del mundu’l Día Internacional de les Biblioteques, una fecha que busca resaltar la importancia que tienen esta clas d’instituciones pa la historia humana como abellugu de la so cultura, de los sos escritos y de les sos creyencies.
Nesta edición, colos lemes Una ventana abierta al mundu y Por un futuru sostenible, el Gobiernu d’Asturies destaca’l papel fundamental que desempeñen toles tipoloxíes de biblioteques p’algamar los Oxetivos de Desenvolvimientu Sostenible de l’Axenda 2030.
