‘Muyeres’ y ‘Muyeres II’, dos grabaciones fundamentales del colectivu de música tradicional Muyeres, yá tán disponibles dende cualquier parte del mundu.Dende esta selmana yá tán disponibles en plataformes musicales les dos primeres grabaciones del colectivu de música tradicional Muyeres:Muyeres (1994) y Muyeres II(1997), editaos pol sellu Fono Astur. Cola dixitalización d’estos discos por parte de Musicasturiana.com, el patrimoniu musical tradicional asturianu sigue espardiéndose per tolos países del mundu.
Muyeres entamó’l so camín en 1993 col oxetivu de reivindicar el protagonismu de les muyeres na tradición oral y poner en valor la música de percusión d’Asturies. Nestes más de tres décades dende que se formó’l proyectu, participaron más de 150 muyeres y collaboradores. Muyeres –Dances, bailles, ramos, romances y cantares de los conceyos d’Asturies– foi’l so primer trabayu, un doble discu asoleyáu en 1994. Nél puen sentise les voces, percusiones y instrumentos de grupos d’investigación etnográfica como l’Andecha Folclor d’Uviéu, L’Aniciu, Escontra’l Raigañu, L’Aniciu o Xaranzana, amás de dellos exemplos de tonada de Mariluz Cristóbal Caunedo.
En 1997 continúen cola xera de reconocimientu de les muyeres como depositaries del patrimoniu musical y espublicen Muyeres II, un doble discu col que siguen la senda de Muyeres, la recopilación y interpretación de cantares tradicionales de les tres zones del país: dances, ramos, siegues, vaqueires, xiraldiyes, música pal baille a lo suelto y más melodíes. Dambes grabaciones foron y son un exerciciu de memoria imprescindible, la representación del perimportante trabayu etnográficu que los distintos grupos y colectivos ficieron pa caltener y interpretar el patrimoniu oral y la tradición musical d’Asturies.
Gracies a la collaboración d’Aida Iriarte, les pistes pudieron dixitalizase y los dos primeros trabayos de Muyeres yá puen sentise dende cualquier llugar del mundu.
