A terceira edición del Xuntoiro convirte Santalla
en capital da cultura en eonaviego

•  El conceyo de Santalla ha a acoyer un programa completo de propostas lliterarias, musicales y escénicas en eonaviego
• As actividades, de baldre y pra toda clas de públicos, han a ferse os días 22, 23 y 24 de novembre

A Conseyeiría de Cultura, Política Llingüística y Deporte celebra al llargo dos días 22, 23 y 24 a terceira edición del Xuntoiro, el encontro que ten como obxetivo favorecer el intercambeo das industrias culturales qu’utilizan el eonaviego. Se en ocasióis anteriores as actividades se celebraron na Veiga y El Franco, este ano é el conceyo de Santalla d’Ozcos el qu’acoye integramente esta celebración da llingua y a cultura da parte máis occidental d’Asturias.

Música, conferencias, lliteratura, artes escénicas, espectáculos pra nenos y nenas, mercao popular, biblioteca ambulante, proyección d’audiovisuales ou visitas guiadas a equipamentos son dalgúas das iniciativas qu’a conseyeiría pon en marcha nesta edición.

Todas as actividades son de baldre y tán dirixidas a todos os públicos, con protagonismo especial del infantil, al que se dedica especificamente a xornada matinal del venres 22. A partir d’esta fecha desenvólvese un programa qu’incluye talleres, sesióis de cuntacontos, a presentación dos últimos trabayos lliterarios editaos en eonaviego, representacióis teatrales, recitales poético-musicales y a noite del rock eonaviego.

Tamén tán programadas outras accióis, como a proyección d’audiovisuales en eonaviego ou visitas guiadas á Casa Natal del Marqués de Sargadelos y a ruta das esculturas de Santalla. Ademáis, ha a poñerse en marcha al llargo dos tres días úa biblioteca ambulante eonaviega. El sector hosteleiro tamén ha a formar parte del Xuntoiro, pois os chigres y restaurantes del conceyo han a unirse á celebración repartindo poemas, en formato marcapáxinas, a os sous clientes y clientas.

La tercer edición del Xuntoiro convierte Santalla
en capital de la cultura n’eonaviegu

• El conceyu de Santalla d’Ozcos va acoyer un programa completu de propuestes lliteraries, musicales y escéniques n’eonaviegu
• Les actividaes, de baldre y pa toa clas de públicos, van facese los díes 22, 23 y 24 de payares

La Conseyería de Cultura, Política Llingüística y Deporte celebra los díes 22, 23 y 24 la tercer edición del Xuntoiro, l’alcuentru que tien como oxetivu favorecer l’intercambéu de les industries culturales qu’utilicen l’eonaviegu. Si n’ocasiones anteriores les actividaes se celebraron n’A Veiga y El Franco, anguaño ye’l conceyu de Santalla d’Ozcos el qu’acueye dafechu esta celebración de la llingua y la cultura de la parte más occidental d’Asturies.

Música, conferencies, lliteratura, artes escéniques, espectáculos pa neños y neñes, mercáu popular, biblioteca ambulante, proyección d’audiovisuales o visites guiaes a equipamientos son dalgunes de les iniciatives que la conseyería pón en marcha nesta edición.

Toles actividaes son gratuites y tán dirixíes a tolos públicos, con protagonismu especial del infantil, al que se dedica específicamente la xornada mañanera del vienres 22. A partir d’esta fecha desenvuélvese un programa qu’incluye talleres, sesiones de cuntacuentos, la presentación de los últimos trabayos lliterarios editaos n’eonaviegu, representaciones teatrales, recitales poético-musicales y la nueche del rock eonaviegu.

Tamién tán programaes otres acciones, como la proyección d’audiovisuales n’eonaviegu o visites guiaes a la Casa Natal del Marqués de Sargadelos y la ruta de les escultures de Santalla. Amás, va ponese en marcha a lo llargo de los trés díes una biblioteca ambulante eonaviega. El sector hosteleru tamién va formar parte del Xuntoiro, porque los chigres y restaurantes del conceyu van xuntase a la celebración repartiendo poemes, en formatu marcapáxines, a los sos veceros y veceres.

*Axúntase’l programa completu del Xuntoiro con toles actividaes.