- Fonte: Actualidá Asturies / LNE / El Principáu va illuminase de verde esta selmana baxo’l lema #AsturiesDeRestallu p’apoyar la candidatura de la Cultura Sidrera
El Gobiernu d’Asturies va illuminar los sos edificios principales de verde del 2 al 8 d’avientu. Va facelo como acción de sofitu a la candidatura de la Cultura Sidrera Asturiana a Patrimoniu Cultural Inmaterial de la Humanidá, declaración que se decide esta selmana en Paraguái.
/ 
- L’Executivu invita a tolos conceyos, entidaes y sociedá civil a sumase la illuminación en verde de les fachaes y compartilo en redes cola etiqueta
- La conseyera de Cultura va defender la candidatura, previsiblemente, esti miércoles n’horariu de tarde n’Asunción (Paraguái)
La conseyera de Cultura, Política Llingüística y Deporte, Vanessa Gutiérrez, y el director xeneral de Patrimoniu Cultural, Pablo León, van tar na capital paraguaya pa defender la candidatura asturiana ante los Estaos miembros de la UNESCO. Faenlo dientro de la delegación española que coordina’l Ministeriu de Cultura.
D’esta manera, la illuminación de color verde que va llucir na fachada de bien de llugares señalaos del Principáu sirvir de sofitu al actu de defensa que, previsiblemente, va desarrollase’l miércoles, 4 d’avientu, n’horariu de tarde.
Dalgunos de los equipamientos más destacaos que se van vistir de verde sidra son l’edificiu de la Presidencia del Principáu, el Muséu de Belles Artes d’Asturies, la torre de La Llaboral, la Quinta Guadalupe de Colombres o’l Centru Niemeyer, ente otros. A esta iniciativa, impulsada pola Conseyería de Cultura, tamién sumaron bien de conceyos, instituciones públiques y privaes y centros asturianos nel esterior.
Pa unir esfuerzos, l’Executivu llanzó la etiqueta #AsturiesDeRestallu al traviés de la qu’invita a toes aquelles entidaes que s’illuminen de verde esta selmana a compartir en redes sociales les semeyes y videos con ella, unviales a conseyeriadecultura@asturias.org y mencionar a la conseyería nes publicaciones (@culturaAST).
