- Fonte: MusicAsturiana / cartelu / merca’l llibru discu equí
El llegáu de Nacho Fonseca a traviés de Seliquín y Xentiquina nun tien llendes y esti xueves 19 va volver amosase. El Conservatoriu-Escuela de Música de Mieres entama l’eventu Asina suenen… les canciones de Xentiquina y Nacho Fonseca. Nél va participar un coru formáu por venticinco profesores y l’alumnáu de sestu de primaria del colexu Aniceto Sela; amás de dellos músicos. Van ser más de 140 persones les que van xubir al escenaru del Auditoriu Teodoro Cuesta pa interpretar 10 cantares míticos de la formación. Too ello de baldre y a les 19h.
Nesta cita Fonseca tamién va tar acompañáu por Alicia Álvarez, periodista, música y responsable de La Fabriquina, la editorial y discográfica qu’asoleyó’l llibru-CD Canciones pa la Xentiquina. Ente los dos van presentar les canciones que van dir sonando y, como presenten dende’l Conceyu Mieres, «de xuru que Nacho va cuntar munches de les anécdotes que vivió nestos años al frente de Xentiquina».
Les 10 canciones que van sonar son les mesmes que tán compilaes en Canciones pa la Xentiquina. Una selección sentimental de Nacho Fonseca, cola particularidá de que los arreglos musicales tán fechos pol profesoráu del Conservatoriu-Escuela de Música de Mieres. D’esta manera, pianu, teclaos, violín, clarinete, guitarra, curdión diatónicu, saxofón, violencellu, batería, flauta y percusiones, van dar mayor coloríu a estos temes y acompañar al coru de voces.
Una obra exitosa
Canciones pa la Xentiquina ta siendo ún de los trabayos más reconocíos de la temporada. La Fabriquina editó n’abril esta obra qu’axunta diez de los temes más conocíos de Xentiquina y Seliquín y que formen la banda sonora de la infancia de delles xeneraciones n’Asturies. La música ta acompañada poles ilustraciones de l’artista Laura Bitxo y por dellos testos alredor d’esti proyectu pioneru nel ámbitu de la educación y de la música.
Xentiquina ye una de les formaciones musicales más importantes pa la llingua asturiana, yá que foi l’únicu grupu formáu esclusivamente por neños y neñes y, per 25 años, foi la única formación que facía cantares n’asturianu pa la reciella. La so historia ye inseparable de la del mayestru Nacho Fonseca, que nel cursu 1986-1987 cuando daba clases en Porrúa, decidió facer un grupu musical con dellos de los sos escolinos. Llamáronse Seliquín y llegaron a grabar un discu. Col treslláu de Fonseca a dar clases a Lieres, ésti reconvirtió’l proyectu en Xentiquina. Foi una revolución pa la música n’asturianu, una ferramienta imprescindible pal enseñu de la nuestra llingua y tou un éxitu; asoleyaron dellos discos, dieron un centenar de conciertos per escueles y escenarios del país y involucraron a cientos de neños y neñes na xera de cantar n’asturianu.
