«Pali que pali va remitiendo’l temporal»
- Alborecemos col cielu cubiertu y lloviendo na mayor parte d’Asturies con unes temperatures que tan alrodiu de los 7ºC, rexistrándose nel puirtu Payares -1,5ºC onde sigue nevando persistentemente y se fae l’usu obligatoriu de cadenes o neumáticos d’iviernu pa los turismos y ta peslláu pa camiones ya vehículos articulaos.
- Güei vamos notar una meyoría nel tiempu cola apertura de dellos claros o abancios nes hores centrales del día, anque na cordelera seguirá nevando por mor de les nubes de retención con unes temperatures que camudarán poco o descenderán llixeramente. La cota de nieve rondará los 900m y l’arie nordés soplará seliquinamente.
- Mañana miércoles tovía vamos tener nubosidá abondosa con precipitaciones, sobre too en zones de montaña onde seguirá nevando perriba de los 800-900m, l’aire sedrá sele ya variable y les temperatures descenderán un poquitín más.
- El xueves alboreceremos con escasa nubosidá, sicasí no fonderu los valles puen surdir borrinos y nublines y xelará na mayor parte d’Asturies anque pel día ellí onde entren los rayinos de sol calecerá dalgo l’ambiente a primera hora de la tarde.
- El restu la selmana vamos tener dalgún intervalu nuboso entemeciu ente grandes claros o abancios con xelaes nuecherniegues más probables nes zones favoretibles.
Semeya d’archivu.
