«Despedimos l’añu con fríu y xelu»
- Alborecemos col cielu escampláu ya con unes temperatures que tan alrodiu de los 2ºC, rexistrándose nel puirtu Payares 0ºC.
- Güei volveremos a esfrutar del sol en toa Asturies anque nun sedrá hasta primera hora de la tarde cuando calezcan les temperatures, pa dexanos un ambiente afayaizu. L’aire sedrá sele ya variable y entamaremos el nuevu añu con muncho fríu y xelando no fonderu los valles.
- Mañana miércoles aumentará la nubosidá a partir del mediudía con unes temperatures másimes en llixeru ascensu ya coles mínimes que volverán a ser baxes, xelando en munches zones del interior asturianu. L’aire sedrá sele ya variable con predominiu de la componente sur.
- El xueves tendremos más nubes pero sin precipitaciones ya con unes temperatures que tovía van caltenese baxes, ya’l viernes pue que llueva dalgo al atapecer con un ascensu moderáu de les temperatures que fadrá que temple abondu l’ambiente. Yá pa dempués de reis hai muncha indefinición nos modelos meteorolóxicos, podemos tener una entrada fría potente o tolo contrariu, vientu ábrigu y temperatures suaves, seguiremos sollertes y vos diremos contando.
Semeya que mos l’apurre’l nuesu collaciu García Xurdin.
