» Tiempu seliquino»
- Alborecemos con nubosidá estratificada ya con unes temperatures que tan alrodiu de los 8ºC, rexistrándose nel puirtu Payares -2,8ºC.
- Güei van dir dixebrándose los estratos del alborecer pa dexanos el cielu con grandes claros o abancios, l’aire sedrá sele ya variable y les temperatures másimes subirán dalgo.
- Mañana domingu la entrada de vientu de componente noroeste anticiclónicu mos apurrirá nubosidá que sedrá más abondosa pela tarde cuando podremos tener dalguna precipitación feble ya dispersa. Les temperatures másimes descenderán ya tendremos raches moderaes de vientu nel llitoral y zones altes.
- El llunes vamos tener precipitaciones intermitentes de calter feble y en forma d’orpín, sobre too pela mañana onde la nubosidá baxa sedrá abondosa con unes temperatures en descensu ya cola cota de nieve que va tar alrodiu de los 1400-1500m.
- El martes tovía va caltenese la nubosidá que sedrá estratificada y en la nueche bona surdirán borrinos y nublines no fonderu los valles y zones llanes con unes temperatures que van camudar poco, dexándonos un ambiente más bine fríu.
- El día de Navidá dirán dixebrándose los borrinos y nublines del alborecer pa dexanos un cielu poco nuboso o escampláu con unes temperatures másimes n’ascensu que mos apurrirán un ambiente afayaizu a primera hora de la tarde.
- Paez que hasta fin d’añu‘l tiempu sedrá mui estable, domináu pol anticiclón con xelaes nes zones favoretibles peles nueches y temperatures prestoses nes hores centrales del día.
