» L’iviernu asoma la patina»
- Alborecemos col cielu mui nuboso y xarabatos intermitentes y con unes temperatures que tan alrodiu de los 11ºC, rexistrándose nel puirtu Payares 4,3ºC
- Güei vamos tener xarabatos intermitentes que sedrán más frecuentes, intensos ya persistentes na cordelera, sobre too na fastera oriental con una cota de nive qu’anicialmente va tar perriba de los 1900m pero con tendencia a baxar rápidamente a los 1300m. L’aire de componente noroeste va soplar con raches fuertes en puntos del llitoral y zones altes de montaña con unes temperatures en descensu moderáu. Tamién tendremos temporal na mar con foles de más de 5m.
- Mañana domingu van intensificase los xarabatos, sobre too en zones de montaña de la fastera centru-oriental, onde puen ser persistentes y de calter fuerte, amás la nieve surdirá copiosamente perriba de los 900-1000m. Nel restu sedrán menos intensos y más espaciaos. Les temperatures en descensu y l’aire seguirá siendo fuerte en zones del llitoral y puntos altos de montaña que mos dexará mui mala mar en too’l Cantábricu.
- El llunes l’aire dirá perdiendo fuercia y rolando a componente norte, faciendo que les precipitaciones s’intensifiquen nos valles y zones llanes, la nieve seguirá cayendo copiosamente perriba de los 1000-1200m y les temperatures camudarán poco.
- El martes seguiremos con una situación mui asemeyada, sicasí l’aire va dir rolando a nordés faciendo que baxen les temperatures, asina como la cota de nieve que rondará los 700-800m. Esti día’l vientu amenorgará muncho favoreciendo los desplomes de la cota de nieve nos valles averaos a la cordelera ya que los xarabatos seyan estacionarios y duren más tiempu.
- El miércoles dirán remitiendo les precipitaciones y abriéndose dellos claros o abancios pero con unes temperatures baxes que mos dexarán un ambiente mui ivernal, xelando en munches zones antes de finar el día.
- El xueves va tar poco nuboso o escmpláu con xelaes xeneralizaes en toa Asturies.
- Los siguientes díes tendremos intervalos nubosos y temperatures baxes pero esto yá lu diremos viendo.
