«Fae un cutu qu’escarabaya’l pelleyu»
- Alborecemos con dalgo de nubosidá alta y xelaes no fonderu los valles con unes temperatures que tan alrodiu de los 2ºC, rexistrándose nel puirtu Payares -1ºC. Destaca a esta hora los -22,4ºC de la Vega de Lliordes na vertiente lleonesa de los Picos d’Europa.
- Güei vamos tener el cielu empuercáu de nubes altes pela mañana pa dir desapareciendo de tarde cuando va quedar el cielu escampláu, volverá a xelar en munchos valles del interior antes de finar el día. Les temperatures van camudar poco, l’aire sedrá sele ya variable y l’ambiente seguirá siendo fríu ya ivernal.
- Mañana sábadu alboreceremos con escasa nubosidá y xelaes xeneralizaes no fonderu los valles y zones de montaña, la mañana va caltenese fría y nun sedrá hasta primera hora de la tarde cuando la llume del sol calezca l’ambiente, asina y too pa dexanos unes temperatures que malpenes pasarán de los 10ºC, l’aire seguirá siendo sele ya variable con predominiu de la componente sur. A últimes hores pue surdir dalgo de nubosidá y nublar el cielu.
- El domingu va tar poco nuboso o escampláu con xelaes de nuevu en munches zones d’Asturies, la llume del sol calecerá dalgo l’ambiente a partir del mediudía y de nueche entamará a xelar de nuevu nes zones más favoretibles.
- El llunes tendremos l’anticiclón enrriba nuesu, dexándonos xelaes por iversión térmica, esto quier decir que les xelaes sedrán más intenses y xeneralizaes no fonderu los valles y menos probables nos puertos de montaña por mor del escasu movimientu atmosféricu, faciendo que l’aire fríu más densu y pesáu quede peslláu nel fondu los valles.
- El martes l’aire ábrigu va dir caleciendo abondu l’ambiente a partir de la tarde, pa dexanos un miércoles con nubes medies y altes ya con temperatures suaves.
- Paez qu’a partir del xueves o vienres pue afeutanos una vaguada atlántica que mos dexe un nuevu refrecamientu acompangáu de precipitaciones y dalguna nevada en zones de montaña. Y de cara a la fin de selmana y díes de navidá tengamos anticiclón con xelaes xeneralizaes durante les nueches pero esto yá lu diremos viendo.
Prestosa semeya de l’Arcu de Mea que mos l’apurre’l nuesu collaciu David de Corvera.
