III Semando Fest: 8 de febreru n’Uviéu

El 8 de febreru a les 21h la sala Lata de Zinc d’Uviéu va acoyer el III Semando Fest, festival de música moza n’asturianu. Nél van participar Abéu cola so música tradicional axeitada pal baille; Ferla Megía, col so amiestu de pop, folk, triphip, dembow, rap…; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk. Son distintos estilos pa reflexar la diversidá sonora de la música asturiana y con una característica común: la mayoría de los sos componentes son menores de 35 años.

Tres les exitoses ediciones de 2023 y 2024 -qu’escosaron entraes díes enantes de la so celebración-, vuelve’l festival de música moza n’asturianu qu’entama Musicasturiana.com y Ixuxú Cultura. La iniciativa va más allá de ser un simple conciertu y por eso tien tou una filosofía caracteriza por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; qu’apuesta por da-y oportunidaes a les y los creadores xóvenes y que trabaya tamién por avanzar hacia la igualdá dientro de la música n’asturianu.

D’esta manera, amás de les y los componentes de los grupos, l’equipu del Semando Fest ta formáu por xente mozo: el diseñu y la identidá visual ye obra de la diseñadora Paula Suárez Surimi (Xixón, 1990); Nay Semeya va facer les semeyes y el videu del festival; Raúl Alonso (Xixón, 1999) y Yedra Riesgo (Pravia, 1997) d’Héroes Ensin Nome van volver a presentar la gala y desendolcar llabores de producción, esto último xunto a Claudia González (Lluanco, 1999). Xicu Ariza (Xixón, 1989), responsable d’Ixuxú Cultura y Musicasturiana.com, ye’l coordinador de tol proyectu per última vez, yá que al pasar nel 2025 de los 35 años d’edá va dexar la dirección del Semando Fest pa dar relevu nesta xera y asina caltener la coherencia cola filosofía del eventu.

Entraes yá a la venta

Les entraes yá se pueden mercar en musicasturiana.com por un preciu anticipáu de 12 euros -10 euros pa menores de 26 años- y, si nun s’escosen enantes, en taquilla van costar 15 €. Amás, distintes entidaes públiques y privaes vuelven a patrocinar esti eventu p’ayudar a la so viabilidá económica. Son la Fundación Caja Rural de Asturias, el Conseyu de la Mocedá del Principáu d’Asturies y el Conseyu de la Mocedá d’Uviéu.