Nun hai namás escuru que la mina y les sos fondures
entamada nel corazón d’esta tierra ensin sol
que guarda una ayalga nes sos coraes,
pan pa munches families, identidá y llucha obrera;
que nun teníamos nin oru nin plata
teníamos xente trabayadora y carbón.
David Fueyo y Roberto F. Osorio, ayeri na presentación de ‘Fondures’
Beatriz Álvarez/ Oviedo
La llibrería Kafka & Co, recién reinaugurada, acoyó ayeri la presentación del últimu poemariu del quirosanu David Fueyo, ‘Fondures’.. L’autor tuvo arrodiáu d’amigos y compañeros poetes. Al pie de el, Roberto F. Osorio qu’escribió’l prólogu en quirosán.
El poemariu, qu’en palabres del autor foi escritu «a poco fueu», ye la plasmación d’un importante procesu d’interiorización de la relación de la so familia cola minería, minería de la que nun tiempu, como munchos mozos asturianos, renegó. Sicasí, agora dende’l maduror, David recuperó les hestories que-y cuntaba so güela y averóse a la figura del so bisagüelu Jesús muertu nun desafortunáu accidente mineru’l 24 d’avientu de 1960 y que la so historia reconstruyó con ayuda de Roberto F. Osorio, cronista oficial del conceyu de Quirós y cavilgáu sobremanera ello nun conxuntu de poemes nos que s’entemez señardá ya incertidume.
Mientres la presentación l’autor bien emocionáu recordó distintes anécdotes que foi atesorando pa convertiles nos versos qu’agora ven la lluz. Pa rematar l’actu lleeron dalgunos de los poemes,que llueu van ser presentaos en Quirós.
Fondures: Un viaxe poéticu
dende’l carbón hasta’l pixel
David Fueyo publica Fondures, obra que revisita la vieya tradición de los poemarios mineros con una visión anovada. El poemariu, escritu íntegramente n’asturianu, llega como una propuesta poética que xunta tradición y modernidá, revisitando la hestoria y l’alma de la mina. Al traviés d’una voz íntima, pero reivindicativa, la obra adiéntrase nel ayeri, el güei y el mañana del universu mineru, con una mirada qu’alienda respetu y pertenencia, inclusive dende la perspectiva de quien nunca baxó al pozu.
Fondures transita poles buelgues del carbón y la memoria de los mineros, pero tamién s’atreve a proxectar el tresformamientu d’esti legáu en tiempos d’identidá dixital, meyores tecnolóxiques y l’incertidume del cambiu. Estremáu en trés capítulos (Ayeri, Güei y Mañana), el llibru rescata la dómina culminante de la minería dende’l puntu de vista non solo de quien baxaben a la mina, sinón tamién de quien los esperaben enriba, cavilga sobre’l so cayente y enfusar en cómo les nueves xeneraciones—fíos y nietos de mineros—caltienen y resignifican esti heriedu.
Nunca baxé embaxo /pero embaxo, tampoco/nunca dexé de tar
Con estos versos, l’autor resume l’espíritu del poemariu, que se presenta como un homenaxe a quienes engarraron na mina’l so sustentu, la so llucha y la so identidá y agora atópense con que d’aquello apenes queden unos cuantos castilletes de pies.
El prólogu foi escritu por Roberto Fernández Osorio, cronista oficial de Quirós.
