Nél van entemeciéndose novedaes musicales compuestes en catalán, n’asturianu y, tamién, en gallego-asturianu 
D’esta manera suenen cantares de DRB, Ferla Megía, Herbamora y Vérsica reflexando una diversidá d’estilos que va dende la electrónica de raigañu, hasta’l dembow, pasando pela música tradicional fusionada y el folk-pop-rock.En setiembre de 2023 entamó a emitise en Radio 3 Extra el programa Artículo 3, un espaciu presentáu por Laura González que se define como «un altavoz pa toles llingües del Estáu» y qu’amuesa «la riqueza cultural, la creatividá y la diversidá»de les músiques feches nes distintes llingües minorizaes de la penísula Ibérica. Si bien esti programa ta centráu sobre manera na producción fecha en catalán, euskera y gallegu, na última edición tien protagonismu la música n’asturianu.
«Diálogo musical Asturias-Cataluña» ye’l nome del episodiu emitíu’l pasáu sábadu 18 na plataforma de conteníos audiovisuales Radio 3 Extra. Nél van entemeciéndose novedaes musicales compuestes en catalán, n’asturianu y, tamién, en gallego-asturianu. D’esta manera suenen cantares de DRB, Ferla Megía, Herbamora y Vérsica, reflexando una diversidá d’estilos que va dende la electrónica de raigañu, hasta’l dembow, pasando pela música tradicional fusionada y el folk-pop-rock.
Pela parte catalana suenen nomes como Mama Dousha, Lluc o Mushkaa y, como curiosidá, Doctor Explosion. Precisamente, la mítica banda xixonesa de garage fai de ponte ente Asturies y Cataluña nesti diálogu musical, yá que’l so últimu llanzamientu, ‘Ves-te’n si us plau’, ye un tema en catalán, siendo asina la primer vez que canten notru idioma oficial del Estáu español.
