«Ascensu bultable de les temperatures «
- Alborecemos col cielu poco nuboso en xeneral, sicasí ta empuercáu de nubosidá alta sobre too na fastera ocidental con unes temperatures condicionaes pol vientu, ellí onde ta soplando con fuercia ronden los 15ºC y onde temos abellugaos d’él tamos alrodiu de los 6-8ºC, rexistrándose nel puirtu Payares 4,2ºC.
- Güei va dir n’aumentu la nubosidá media-alta hasta dexanos el día nuble, yá a última hora, al finar el día entamará a llover d’oeste a este con unes temperatures n’ascensu bultable, algamándose los 20ºC en munches zones d’Asturies por mor del vientu ábrigu que pue soplar con fuercia en zones del llitoral y de montaña.
- El prósimu riscar van xeneralizase les precipitaciones con tendencia a dir remitiendo al alborecer. Durante’l día va dir meyorando cola apertura de dellos claros o abancios pela tarde con unes temperatures másimes en descensu moderáu.
- El domingu l’aire nordés pue ser cafiante, baxando abondu la sensación térmica nel llitoral, amás les temperatures siguen baxando y nel cielu vamos tener grandes claros o abancios.
- El llunes y polo menos hasta’l sábadu de la selmana viniente vamos tener enrriba l’anticiclón, dexándonos un tiempu mui estable col cielu poco nuboso en xeneral, xelaes nuechernigues y temperatures contenies al mediudía, sicasí a primera hora de la tarde nes zones soleyeres la llume del sol dexará un ambiente afayaizu.
