«Amenorga l’aire de tarde»
- Alborecemos con dalguna nube alta entemecía ente grandes claros o abancios con raches fuertes d’aire, les temperatures tan alrodiu de los 15ºC, rexistrándose nel puirtu Payares 4,4ºC.
- Güei va dir n’aumentu la nubosidá media-alta pero sin más consecuencies con unes temperatures que van camudar poco o descenderán llixeramente, amás l’aire gallegu amenorgará de tarde pa quedar sele ya variable.
- Mañana vienres tornará l’aire ábrigu faciendo que suban bultablemente les temperatures con másimes qu’algamarán los 20ºC en munches zones d’Asturies, nel cielu tendremos nubosidá media-alta, aumentando al finar el día cuando podremos tener precipitaciones.
- Durante’l riscar del sábadu les precipitaciones sedrán abondoses y xeneralizaes , remitiendo al alborecer, pa dir abriéndose dellos claros a partir del mediudía. Les temperatures en descensu, rolando l’aire a componente norte.
- El domingu predominarán los grandes claros o abancios pero a pesar de la llume del sol sedrá un día fríu con sensaciones térmiques baxes por mor del vientu nordés que pue ser cafiante, sobre too nel llitoral.
- Y la selmana viniente va destacar por les xelaes que sedrán xeneralizaes col cielu espeyáu y temperatures contenies al mediudía.
