Pa festexar esti fechu’l gaiteru maliayu entamó una serie d’actividaes como’l conciertu especial que dio na Semanona de Xixón, la publicación del videoclip ‘Busindre Reel 25‘ y el llanzamientu del discu Platinum Europe Award. 25 Aniversario. Esti trabayu s’asoleyó en formatu físicu xunto col diariu La Nueva España pero dende ayeri yá pue sentise en toles plataformes musicales.
Esti álbum nuevu ta formáu por diez temes que repasen la trayectoria del gaiteru asturianu más internacional d’esti sieglu. Per un llau inclúi cinco pieces que yá formaren parte de Tierra de Nadie -‘Busindre Reel’, ‘Naves’, ‘El Garrotín’, ‘Barganaz’ y ‘Sobrepena’-; y, pel otru, otres cinco que tuvieren n’otros trabayos -‘Albo’, ‘Pericote’, ‘Fandango Los Llobos’, ‘Rubiercos’, ‘Marcha del Dos de Mayo’. Tolos temes tán regrabaos pa da-yos un soníu más actual y revisitar dalgunos aspectos compositivos.
José Ángel Hevia (Xixón, 1967) ye’l gaiteru asturianu más popular d’esti tiempu. Con namás 7 años entamó a tocar la gaita y nestes décades d’actividá foi fundador de bandes de gaites, ganó los premios más prestixosos del mundu y foi ún de los precursores de la gaita midi. Representó a la cultura y a la llingua d’Asturies n’escenarios de tol planeta a los que llevó la so propuesta musical qu’amesta pieces populares, composiciones propies y soníos electrónicos y new age. La publicación d’esti Platinum Europe Award. 25 Aniversario ye un homenaxe a esta exitosa carrera.
