Fonte: El Comercio / Pablo A. Marín Estrada
Los Aguilandeiros de San Xuan de Villapañada, recuperada en 2014.
Les comparses d’aguilanderos están documentadas por tola rexón. Delles hanse recuperáu y el Principáu busca calteneles.
El 1 de xineru, la Guirria y los sos aguilanderos a caballu volverán salir de San Juan de Beleñu (Ponga) escontra Cainava, como cada Añu Nuevu dende tiempu inmemorial (solo atayáu pola guerra civil y la pandemia), tres la merienda de víspores col sortéu de mozos y moces, y trés díes más tarde van faer otru tantu Os Reises del Valledor (Ayande) percorriendo Villalaín, Fonteta y San Salvador. Antes, el pasáu sábadu 14, los Aguilandeiros de San Xuan de Villapañada (Grau) faíen lo propio en Rozaes, Acebéu, La Llinar y San Xuan. Y el 12 de xineru, Valdesoto (Siero) va ser de nuevu escenariu de los sos Sidros y Comedies.
Son les Mazcaraes d’Iviernu recuperaes n’Asturies y que van completar el ciclu n’antroxu el Zamarrón de L.lena, los Mazcaritos de Rozaes (Villaviciosa), los Guillandeiros de Tinéu y los Mazcaritos d’Uviéu. Va escases selmanes, la conseyera de Cultura, Vanessa Gutiérrez, anunciaba’l propósitu d’estender a toes estes manifestaciones tradicionales la declaración de BIC (Bien d’Interés Cultural), una protección que yá teníen los Sidros.
Xosé Antón Ambás lleva años documentando nel so Arquivu de la Tradición Oral (ATOM) estes celebraciones y empondera la iniciativa de Cultura, una y bones «el patrimoniu inmaterial de les mazcaraes d’Asturies hai d’entendese como un conxuntu», afirma. Cree importante allugales nel contestu de «les mazcaraes en redol al solsticiu d’iviernu de toa Europa» y que perviven nuna franxa de la península, del norte de Portugal a Navarra.
Ente los elementos comunes que caractericen tamién a les asturianes, señala’l so calter de ritu de camín nel que los mozos salen a pidir l’aguilandu revistíos de personaxes «que se repiten anque camuden formes o nomes» y estremaos en dos bandos: el de les fuerces del Bien y les del Mal. Asina asocede en Os Reises del Valledor, una de les ‘mazcaraes’ recuperaes por Ambás y Vezos Ástures, onde la comparsa repartese ente ‘los de roupa boa’ (los guapos/bonos) y ‘los de roupa ruía’ (los feos/malos). Ente los segundos el Rodalo, encapucháu y armáu d’una pala de ‘forno’ cola que va ‘arrodalando’ a tou y tolos que s’atopa o la ‘cardadoira’, qu’amás de cardar llana, despioja con ella a la xente y el ‘choqueiro’, col so palu d’ablanar y esquiles na cintura. Ente los guapos, el valencianu’, elegante, les ‘madames’, coquetas o la ‘gocha’ encargada de recaldar l’aguilandu.
L’etnógrafu recuperó en San Xuan de Villapañada la tradición de los Aguilandeiros fai agora diez años, entrevistando na parroquia a los vecinos de mayor edá y que dexara de salir siete décades tras. Los sos personaxes repiten, con variantes, roles y formes de mazcaraes como la del Valledor, Tormaleo o d’otres zones del centru y occidente. Ente’l bandu del bien ‘la dama’ y ‘el galán’ o los cuatro maragatos’, qu’equí baillen, y nel del mal, ‘el vieyu’ y ‘la vieya’, que pare una pega, la ‘Cenicera’ que refundia ceniza o, el ‘Afeitón’ y les sos navayes de gadaña, el ‘Diablu’, con cuernos de güe y ‘forcáu’ o’l ‘osu’, qu’apavorien a los más pequenos. Ambás cree necesariu caltener la esencia de la tradición: «Esto nun ye un desfile o un espectáculu, revistimos una vegada al añu pa pidir l’aguilandu poles cases dando vida a una tradición y a un territoriu, el del mundu rural que sume», indica.
Pablo Canal preside l’asociación El Cencerru de Sidros y Comedies de Valdesoto que recuperó en 2005 esta tradición, tres atayaos intentos realizaos enantes. El primer datu que la menta ye de 1847, una carta del alcalde de Siero defendiendo la so antigüedá en suspendiendo la Guardia Civil una representación en LaPola. La documentación más sólida que la valida son les comedies escrites por José Noval dende l’añu 1876 hasta 1937, que caltien el Muséu Pueblu d’Asturies dientro de los sos fondos. Na celebración actual procúrase ser fieles a esi espíritu.
