Los sos diseños en cartelería cúntase por victories en toa España, anque nun se llibra del discutiniu con quien cuestionen la so forma de creación. El diseñador que trunfa por toa España coronase col cartelu del Antroxu xixonés (anque con discutiniu pol usu de IA). Magar que ta acostumáu a ganar infinidá de concursos del estilu, para Rubén Lucas foi bien gratificante recibir esti premiu al ser «un arguyu que reconozan el llabor d’un murcianu n’unes fiestes tan importantes para Xixón».
El so senciellu diseñu busca que cada persona lu inetrpreste al so gustu. «Gústame dexar marxe y que sía l’espectador el que saque les sos conclusiones. Intenté faer un cartelu simple, pero de calter simbólicu», detalló l’artista que cunta con infinidá de premios per tol país, incluyíu unu anterior en Xixón.
En 2017 y coincidiendo col 30º aniversariu del Concursu de Charangues, el so dibuxu d’un arlequín vistíu de colloráu y verde, tocando’l tambor y agarráu a unos banderinos foi escoyíu para imaxe del Antroxu. «Cuando recibí la llamada esta mañana, comenté-yos que yá ganara enantes. Nun s’alcordaben», desveló ente rises Rubén Lucas.
Solo fai falta teclear el so nome n’internet para ver l’apolmonante cantidá de premios que recibió, dalgunos d’ellos col acompañamientu de «polémicu». El motivu ye que se-y acusa d’utilizar intelixencia artificial para realizar los sos diseños, daqué qu’el mesmu artista nin confirma nin desmiente. Tamién se desveló l’usu d’obres bien similares presentaes en distintos concursos y nes que camuden pequenos detalles de color o d’estilu.
Rubén Lucas aprofia que tien una trayectoria de 18 años como ilustrador y nos postreros tuvo qu’encarar unos barruntos que se niega a alimentar. Nel casu concretu del Antroxu de Xixón les bases llegales nun señalen nada al respeutu del usu de la intelixencia artificial, polo qu’estes práctiques seríen dexaes, dexando asina que diseños realizaos con esta ferramienta puedan presentase.
