- Fonte: Musicasturiana / web
La Xunta Xeneral aprueba la PNL pa incluyir la música tradicional nel currículum educativu. El gobiernu comprométese a desendolcar nueves midíes pa cumplir colo plantegao por Convocatoria por Asturies nesta Proposición Non de Llei.
Güei llegó a la Xunta Xeneral l’alderique y votación de la Proposición Non de Llei presentada pol Grupu Parlamentariu Convocatoria por Asturies IX- Mas País-IAS pa incluyir la música tradicional asturiana nos currículos educativos d’Educación Infantil, Primaria y Secundaria Obligatoria. La votación aprobóse col apoyu de la FSA, Convocatoria por Asturies, Foro Asturias y la diputada Covadonga Tomé; l’abstención del PP y la oposición de Vox. Anque la proposición nun tien efectos xurídicos vinculantes, sí que supón una orientación política, comprometiéndose los partíos de gobiernu a impulsar midíes nueves pa favorecer mayor presencia nos currículos y entendiendo que fai falta da-y puxu.
Esta propuesta nació a iniciativa de la conceyala d’Izquierda Xunida-Mas País-IAS nel Ayuntamientu de Xixón, Noelia Ordieres, que la selmana pasada presentaba xunto al voceru de la so coalición nel parlamentu asturianu, Xabel Vegas, esta proposición qu’insta al Gobiernu d’Asturies a facer una revisión de los currículos pa «garantizar que’l conocimientu, la práctica y la valoración de la música tradicional» aporte a toles etapes educatives; diseñar y implementar estratexes de formación pa cualificar al profesoráu nesti sen; fomentar la collaboración coles asociaciones, coleutivos y persones espertes nel ámbitu pa desendolcar mesmo materiales pedagóxicos qu’actividaes complementaries y estraescolares; y, amás, evaluar periódicamente l’impautu d’estes midíes.
«Ye perbona noticia’l compromisu del gobiernu d’Asturies col sofitu d’esta PNL, p’algamar un conocimientu y una estensión del nuesu patrimoniu cultural en toles etapes educatives obligatories y da-y el mesmu protagonismu y reconocencia que se-y da a otres formes culturales«, declaró Ordieres a Musicasturiana.com al conocer l’aprobación del testu. Amás, la conceyala xixonesa quixo «agradecer el llabor de quien lleva años trabayando nesti sen pa dignificar el nuestru patrimoniu».
La votación de la PNL pa incluyir la música tradicional asturiana nos currículos educativos aprobóse güei col apoyu de @fsa_psoe, @iuasturias-Convocatoria por Asturies (coalición que presentó la inicaitiva), @foroasturias y Covadonga Tomé 🗳️ El @pp_asturias abstúvose y Vox votó a la escontra 🥁 Anque la proposición nun tien efectos xurídicos vinculantes, sí que supón una orientación política, comprometiéndose los partíos de gobiernu a impulsar midíes nueves pa favorecer mayor presencia nos currículos y entendiendo que fai falta da-y puxu.
