- Cartelu / Fonte: Actualidá Asturies /
Igualdá d’una vegada, por toes. Coeducar pa contruyir la igualdá
El Gobiernu d’Asturies va dedicar anguaño’l Día Internacional de les Muyeres a la educación n’igualdá. El Principáu entama l’actu institucional n’Avilés, sol lema Igualdá d’una vegada, por toes La programación con motivu del 8M inclúi la presentación d’un documental sobro la hestoria del deporte femenino n’Asturies y el fomentu de la coeducación al traviés d’iniciatives n’espacios públicos, biblioteques y redes sociales.
El Gobiernu d’Asturies va dedicar anguaño’l 8 de marzu (8M), Día Internacional de les Muyeres, a la educación n’igualdá como ferramienta clave pa prevenir la violencia sexista y combatir la desigualdá dende la escuela. L’Institutu Asturianu de la Muyer escoyó’l lema Igualdá d’una vegada, por toes. Coeducar pa construyir la igualdá pa poner el focu na importancia de promover una sociedá más igualitaria dende les edaes más tempranes.
La Dirección Xeneral d’Igualdá entamó un ampliu programa d’actividaes a lo llargo del mes de marzu pa conmemorar el 8M. L’actu institucional va celebrase nel Teatru Palacio Valdés d’Avilés, el día 7, a les 17:00 hores y va cuntar cola intervención del presidente del Principáu, Adrián Barbón. A otru día, el sábadu 8 de marzu, el Gobiernu d’Asturies va participar na manifestación convocada en Xixón pa reivindicar la igualdá real y efectivo ente homes y muyeres.
Ente les iniciatives destacaes figura l’espaciu interactivu Esperimenta la coeducación, que se va desenvolver n’Uviéu. Esta actividá, dirixida a tola ciudadanía, va dexar conocer exemplos concretos de cómo se trabaya la coeducación nes aules al traviés de dinámiques participatives.
Per otra parte, el 18 de marzu va desenvolvese na Escuela de Comerciu de la Escuela de Comerciu de Xixón l’actividá Visu en Curtiu, xuna amuesa de curtiumetraxes empobinaos por muyeres, que se va acompañar d’un coloquiu, y el xueves 20 de marzu, nel Paraninfu de la Llaboral de Xixón, va estrenase la película documental Invencibles. Les hestories ocultes de les muyeres nel deporte asturiano, un trabayu que recueye’l testimoniu de deportistes que marcaron un antes y un dempués nes sos disciplines. Tres la proyección, va celebrase xuna mesa redonda con delles de les protagonistes, nun alcuentru que va dexar cavilgar sobro los retos y meyores na igualdá dientro del ámbitu deportivu.
Amás, a lo llargo del próximu mes van desenvolvese socesives iniciatives pa reforzar el mensaxe del 8M. Ente elles, la campaña en redes sociales Coeducar ye…, na que, en collaboración cola comunidá educativa, van sopelexase les pilastres fundamentales de la coeducación de manera senciella y accesible.
Tamién se va poner en marcha’l programa de cuentacuentos coeducativos Que fluya la coeducación, en collaboración cola Rede de Biblioteques Públiques del Principáu d’Asturies y asociaciones locales. Nestos alcuentros, persones nueves y adultes de distintos colectivos van lleer cuentos recoyíos na Guía de llectures coeducatives pa Infantil y Primaria del Institutu Asturianu de la Muyer, coles mires de tresmitir valores d’igualdá dende la infancia.
Coles mesmes, en marzu celebrará l’actu d’entrega de los distintivos Marca d’Excelencia n’Igualdá, un sellu que reconoz el llabor d’aquelles empreses y entidaes que destaquen na aplicación de polítiques igualitaries ente muyeres y homes. Tamién se va presentar el proyectu Vigías de la Igualdá, en collaboración cola Universidá d’Uviéu..
Pie de semeya: la directora xeneral d’Igualdá, Maria Jesús Alvarez, y la vicepresidenta del Principáu, Ximena Llamedo.
