- Fonte: LNE /
La paz prémiase ya investígase nel colexu Ruiz-Tilve de La Corredoria. Los 448 alumnos de Primaria del centru uvieín ellaboren trabayos sobro los galardonaos y candidatos a les distinciones que concede’l colexu. Toos esos materiales axúntase en llibros que se regalen a los condecoraos. Un proyectu que llega a tolos cursos de Primaria.
Al empecipiase cada añu, dende fai siete, los alumnos de Primaria del colexu públicu Carmen Ruiz-Tilve entamen un trabayu d’investigación. Esti llabor ta venceyada al VII Premiu pola Paz que convoca’l centru que lleva’l nome de la catedrática xubilada de Didáctica de la Llingua y Lliteratura na Universidá d’Uviéu, escritora y cronista oficial de la ciudá. Los premiaos nes dos categoríes -individual ya instituciones-, que nesta edición fueron el cantante Rodrigo Cueves y Mas Paz (Movimientu Asturianu pola Paz), y el restu de candidatures presentaes lleguen a les aules.
Y ende empieza l’estudiu. Primero que s’apurrieren les distinciones el 30 de xineru, coincidiendo col Día de la Paz, los alumnos de los seis cursos de Primaria estudiaron la vida y la trayectoria profesional de los ocho aspirantes al Premiu pola Paz «Carmen Ruiz-Tilve». El so trabayu esponse nel centru y dempués axúntase, enllíbrase y cada llibru unvíase a los candidatos», aseguraron la profesora Ana Pérez y el secretariu del colexu, Manel Gómez.
«Cultura de paz». N’unos díes, los distinguíos «pol so decidíu apurra na construcción d’una cultura de paz», van recibir ese regalo, que forma parte del premiu que concede’l centru allugáu en La Corredoria. La finalidá d’esti llabor que realicen los 448 alumnos de Primaria, resaltó la directora del colexu, Adriana González, ye «tresmiti-yos valores rellacionaos cola cultura de la paz, la solidaridá, la empatía y la collaboración desinteresada pol bien común».
«Buscamos poner de relieve’l trabayu en munches ocasiones silenciosu de persones que s’esmolecen polos demás y que creemos merecen visibilizase y dales a conocer como exemplu de vida para’l nuesu alumnáu», señaló. En 6.º cursu se documentaron sobro’l cantante Rodrigo Cuevas, que nun pudo allegar a recoyer el premiu al atopase de xira en Chile pero que-yos unvio un vídeu pa estima-yos la distinción.
«Fiximos presentación n’otres clases y cada alumnu fixo un dibuxu», indicó Daniel Bombín. Amás, afirmó l’alumnu, «ellaboróse un mural». Los trabayos centraos en Rodrigo Cuevas tán espuestos nel *hall del centru, mui cerca del accesu, al pie de los inspiraos en Maspaz (Movimientu Asturianu pola Paz). A unos metros, les parés del salón d’usos múltiples axunten el restu de trabayos realizaos mientres les últimes selmanes nel colexu Carmen Ruiz-Tilve, al qu’alleguen 655 estudiantes.
Noticies. «Lleíamos n’internet noticies que falaben sobro la Rede Europea de Llucha contra la Probeza y l’Esclusión Social», sorrayó Marcos Pérez, de 4.º de Primaria. Con toa esa información pudieron realizar les ilustraciones y el mural. En 2.º centráronse nel Frida Club de Fútbol Femenino, equipu uvieín fundáu en 2022. Los escolares buscaron el so escudu y la equipación d’un club que munchos de los estudiantes conocíen yá antes d’empezar a buscar datos.
Los alumnos de 1.º de Primaria averárense al trabayu que desenvuelve Protección Civil de Piloña y tamién por Gonzalo Míguez, coordinador de Protección Civil n’Uviéu y en 5.º ellaboraron documentación sobro Maspaz. Otros estudiantes centrarense nel Centru Nacional d’Educación nel Deporte y nel exjugador de baloncesto Iñaki Zubizarreta.
Anque tol trabayu realizáu va ser unviáu a los galardonaos y los candidatos al premiu, el centru va guardar una copia. Y darréu puede prosiguise con esti trabayu, indicaron los profesores. El Premiu pola Paz Carmen Ruiz-Tilve lleva siete años destacando a quien apurran na construcción d’una cultura de paz, promoviendo «el desenvolvimientu de capacidaes para’l diálogu, la tolerancia, la cooperación, la conducta ética y la non violencia» y trabayen para «revertir situaciones de probeza y desigualdá».
