Vero Rubio y Anabel Santiago unen les sos voces en ‘Nuna mañana’

Yá ta en YouTube y en toles plataformes musicales ‘Nuna mañana‘, el segundu adelantu del trabayu debut de Vero Rubio. Nesti cenciellu la multiinstrumentista canguesa une la so voz a la d’Anabel Santiago nun cantar sele enllenu de sentimientu que reflexa «cousas de las que cuesta falar n’alto, cousas que nun se dicen, que nun gusta recordar», como apunta Rubio. La canción ve la lluz a falta de cinco díes pa que remate la campaña de crowdfunding en Verkami cola que l’artista quier editar el llibru y discu Vou.

«Elisa tenía dolores que diban ya venían, nun se movía bien, cansaba a pouco que diera dous pasos ya sentíase sola, pero non por tar sola, senón porque yá nun taba ahí la única persona qu’eḷḷa quería que tuviera, Ḷḷuis». Con estes pallabres desplica Vero Rubio l’orixe d’esti cantar sotituláu «Añada pa despedise, pa Elisa». Musicalmente destaca’l xuegu de cuerdes y el so amiestu a la harmonía del pianu colo que «dan-ḷḷy fuerza a too, cumo quien principia a cuntar dalgo ya de primeras nun-ḷḷy sal la voz, pero acaba pudiendo berralo, glayalo al mundu dende las tripas».

Nesta ocasión, Rubio ta acompañada por Anabel Santiago y asina fala del resultáu: «Las dúas voces que cantan la ḷḷetra sepáranse faciendo harmonías que nun resuelven ya, manteniendo esi malestar en cada pallabra, pouco a pouco van ḷḷenando too de más murnia, de más priesa». La collaboración surdió d’una collaboración televisiva que fixeran interpretando les dos ‘El Romance de la Prisionera’. «El.la cantaba arriba ya you fixe pa mi una voz por embaxu. Quedéme na cabeza cola sensación de cantar con el.la, de cómo se fundían las voces ya las posibilidades que eso daba», comenta la música canguesa d’un cantar «que yá nació pensando na voz d’Anabel».

Crowdfunding
Esti adelantu amuesa daqué de lo que va ser Vou, el primer álbum de Vero Rubio. Nél van dir de la mano música, palabra y imaxe. Como desplica la multiinstrumentista «cada pieza del proyectu, instrumental o vocal, tien un poema/lletra y un videu que la acompaña, como tres caminos que lleven al mesmu destín». El trabayu va editase en dos formatos, un CD y un llibru, que contienen caún unes característiques concretes. Pa sacar alantre esti ambiciosu proyectu l’artista canguesa pidi 3.000 euros nun crowdfunding en Verkami que remata’l 12 de febreru.