Cultura financia xires, esposiciones y formación artística con una llinia de subvenciones dotada con 150.000 euros
El Principáu convoca ayudes pa meyorar les instalaciones deportives de los conceyos con menos de 10.000 habitantes
Cultura financia xires, esposiciones y formación artística
con una llinia de subvenciones dotada con 150.000 euros
- El Principáu convoca ayudes p’ameyorar les instalaciones deportives de los conceyos con menos de 10.000 habitantes
La Conseyería de Cultura, Política Llingüística y Deporte publicó güei nel Boletín Oficial del Principáu (BOPA) dos convocatories de subvenciones pa sofitar el desenvolvimientu de proyectos culturales d’interés rexonal y pa la meyora d’instalaciones deportives en conceyos pequeños. En total, l’Executivu autonómicu destina 200.000 euros a estes dos llinies.
Nel primer casu, el Principáu va conceder 150.000 euros pa sofitar proyectos culturales promovíos por particulares, asociaciones y fundaciones privaes con domiciliu social n’Asturies. Estes ayudes, otorgaes en réxime de concurrencia competitiva, tienen como oxetivu fomentar iniciatives culturales que-y dean un valor significativu a la comunidá.
Les subvenciones van financiar actividaes culturales d’interés rexonal como xires d’espectáculos d’artes escéniques y musicales, cursos formativos y esposiciones d’artes plástiques y audiovisuales. Tamién se va sofitar l’asistencia a feries, festivales y eventos fuera del Principáu que promuevan la difusión del talentu cultural asturianu.
Cada proyectu va poder recibir un máximu de 6.000 euros, y les cantidaes de les ayudes van variar a tenor de la modalidá d’actuación. Asina, van otorgase 2.000 euros pa xires y eventos internacionales, 1.500 pa xires y eventos nacionales, 1.000 pa formación n’estranxeru y 600 pa formación n’España. Amás, un 20 % del presupuestu total acútase pa sofitar entidaes de creación recién y artistes noveles con menos de cinco años de trayectoria.
Les solicitúes van poder presentase hasta’l 3 d’abril. Tola información y los formularios van tar disponibles na sede electrónica del Principáu (https://sede.asturias.es), col códigu de trámite AYUD0023T01, y nel estractu publicáu güei nel Bopa: https://tinyurl.com/2cmwxwpb
Meyora d’instalaciones deportives
La otra convocatoria publicada nel BOPA, dotada con 50.000 euros, va sofitar obres de caltenimientu, arreglu y inversión n’instalaciones deportives de conceyos con menos de 10.000 habitantes. Esta llinia quier ameyorar la calidá y seguranza de los equipamientos locales, fundamentales pal fomentu del deporte y l’actividá física nel territoriu.
Los beneficiarios de la convocatoria son los conceyos que cunten con instalaciones deportives, yá seya xestionaes directamente o al traviés d’un patronatu o fundación deportiva municipal. Cada proyectu va poder recibir hasta 13.500 euros y la execución ha realizase ente’l 1 de xineru y el 31 d’avientu d’anguaño.
El plazu de presentación de solicitúes va tar abiertu hasta’l día 21 de marzu. La información completa pue consultase nel Bopa: https://tinyurl.com/yvkbfvkn
