Esperamos una xornada marcada pola nubosidá en tol Principáu.
Asina tou, nun se refuga l’apertura d’escamplaes siquier nel cordal y otres zones del sur asturianu mientres momentos del día. Nun se refuguen orbayos mientres la mañana na mariña (principalmente la oriental). Nel restu de la rexón la probabilidá de precipitaciones va ser bien baxa.
Los vientos van predominar de nordeste fluexos con raches moderaes nel terciu occidental mientres la segunda metá de la xornada.
Les temperatures máximes van xubir llixeramente nel suroccidente y nel cordal, calteniéndose nel restu. Les mínimes, pela so parte, van baxar nel suroccidente hasta 4 ºC, y de forma más llixera nel cordal y otros puntos del terciu oeste. Nel restu d’Asturies, les mínimes apenes van variar al respective de les anotaes el martes.
El xueves va haber más ratos de sol anque les nubes tamién van faer actu de presencia. Nun s’esperen agües, van xubir les temperatures máximes un pocu, y van baxar les mínimes.
El vienres prevese que la nubosidá vaya a más pudiendo llover pela tarde.
