Afayen petróleu y gas nestes zones d’Asturies… pero solo van ser vidables si’l crudu encarezse. Xeólogos asturianos sondiaron la plataforma continental ente Xixón y Llanes y toparon xacimientos. Fonte: LNE /
En mayu de 2021 entró a valir la llei de cambéu climáticu y transición ecolóxica, que prohibió n’España les nueves autorizaciones d’esploración, permisos d’investigación o concesiones d’esplotación d’hidrocarburos, y tamién de minerales radiactivos. Sicasí, l’actual dependencia enerxética d’Europa quiciabes termine creando nel futuru les condiciones pa reconsiderar esa prohibición. Galicia acaba d’ampliar, col vistu bonu de la ONU, la so plataforma continental, englobando árees nes qu’hai xacimientos de gas, al oeste de la mariña. Y Asturies sería una rexón que podría sacar partíu de la presencia de gas y petróleu qu’hai nel so sosuelu.
Trés empreses, ente elles Hunosa, consiguieron permisu pa buscar petróleu o gas natural n’Asturies. Van facelo na mariña central del Principáu por un periodu de seis años. La Conseyería d’Economía concedió permisu pa investigar en territoriu asturianu n’hasta 18.000 hectárees ente los conceyos de Xixón, Siero,Carreño, Noreña, Sariegu y Villaviciosa.
El permisu pa buscar Petróleu o Gas Natural toma seis años. Nos dos primeros l’equipu d’investigación va dedicase a la interpretación xeofísica del terrén.
Nun ye la primer vegada que se busquen hidrocarburos n’Asturies. En 2008 yá se diera un permisu similar, pero si nesta ocasión los datos son favorables la inversión nesta investigación llegaría a lo menos al millón d’euros.
La estracción de petróleu podría faese por aciu plataformes sobro’l mar, y la de gas, amás d’en les mines, por aciu del fracking. Según l’Asociación de Compañíes d’Esploración y Producción d’Hidrocarburos, sacar partíu d’estes reserves significaría, amás d’una fonte de riqueza, evitar la dependencia enerxética de terceros países.
