- TPA: Asturies tien cinco años pa medrar en cuasi un 20% el tarrén dedicáu a producción ecolóxica
- COPAE n’asturianu /
El COPAE reconoz que 2024 foi un añu d’estancamientu y que la inflación fai que s’avere más el preciu de los sos productos al de los convencionales.
De les más 333.000 hectárees que se dediquen n’Asturies a actividaes agrícoles y ganaderes, cuasi 22.000 correspuéndense con superficie ecolóxica. Ye un 6,5%, un 2% más que va 5 años pero lloñe entá del oxetivu marcáu por Europa. En 2030, el 25% de la superficie tendría que llevar esti sellu señala Carlos Nuño, director técnicu del Copae.
Asturies zarró 2024 con 886 operadores ecolóxicos certificaos pol Copae, 300 más que va 10 años. Medra tamién el númberu de comercios. Güei hai 191 en comparación colos 136 qu’había en 2014. Cifres que podríen medrar coles ayudes previstes pola PAC pa 2025.
En cuantes al bolsillu del consumidor, Copae afirma que la inflación cada vegada avera más el preciu de los sos productos al de los convencionales.
La producción ecolóxica n’Asturies.
Un entornu ideal pa la producción ecolóxica
N’Asturies esisten unes condiciones naturales escepcionales pa la producción ecolóxica. Les camperes húmedes y de monte entemecíos cola superficie forestal ocupen la mayor parte de la superficie de la rexón. Tenemos clima, agua, suelu y biodiversidá.
Les variedaes locales de cultivos y les races autóctones tamién xueguen un papel fundamental pal desenvolvimientu de la producción ecolóxica, pola so adaptación al mediu y la resistencia a enfermedaes.
Agricultura
La mayor parte de la superficie agrícola cultivada n’Asturies son pumaraes de variedaes locales, coles que s’ellabora zumu y sidre.
Otros cultivos importantes son l’arándanu y otros pequenos frutos, el quivi y otres variedaes de fruta. El clima tamién ye ideal pa dellos frutos secos como la castaña, la nuez o l’ablana.
En hortícultura predominen les pequenes producciones con gran diversidá de cultivos. Dalgunos de los cultivos tradicionales con variedaes locales son la faba y la escanda.
Ganadería
Asturies ye una rexón eminentemente ganadera, onde se caltién un manexu tradicional venceyáu al aprovechamientu de la campera y el forraxe de la mesma casería. Esto dexa que’l pasu a la producción ecolóxica sía menos complicáu que cuando se trata de producciones más intensives.
El mayor númberu de ganaderíes son de vacunu de carne, de les races autóctones Asturiana de Los Valles o Carreñana y Asturiana del Monte o Casina. La mayoría de les ganaderíes ecolóxiques tán acoyíes al Conseyu Regulador de la IGP Xata Asturiana.
El vacunu de lleche ye otra de les actividaes más importantes y con gran potencial en producción ecolóxica n’Asturies. La raza principal ye la frisona, anque tamién hai otres races más rústiques y afeches al llendar pastoril.
N’ovín y caprino el númberu de ganaderíes ye inferior. En producción ecolóxica tán dalgunos de los rebaños más importantes de les races autóctones asturianes en peligru d’estinción, la Oveya Xalda y la Cabra Bermeya.
Al igual que pasa en términos xenerales n’Asturies, en producción ecolóxica ye menor el númberu de ganaderíes como l’equín, y hai poques d’aves de corrolada y de porcín.
Apicultura
Asturies ye un paraísu pa les abeyes gracies a la diversidá d’alimentu qu’atopen na vexetación montesa, los montes, les camperes, y los cultivos tradicionales, como la pumarada.
Prodúcense distintos tipos de mieles n’Asturies, amás de les milflores hai mieles monoflorales d’ocalitu, castañal, brezu, carbayu…
Acuicultura y algues
La normativa de producción ecolóxica inclúi tanto la acuiculturacomo’l cultivu y recueyu d’algues marines.
La escelente calidá de les agües de los ríos asturianos y del Mar Cantábricu dexen la producción ecolóxica de trucha, el cultivu d’ostra, y el cultivu y recueyu de distintes especies d’algues.
Alimentos Ellaboraos
Cada vez esiste mayor variedá d’alimentos ecolóxicos que s’ellaboren n’Asturies. Nel rexistru d’ellaboradores del COPAE hai dende pequenes empreses artesanes a grandes industries agroalimentarias. Delles actividaes tán bien venceyaes a la producción primaria, y al mercáu local, por aciu canales curties de comercialización, ente qu’otres industries trabayen con mayores cantidaes y abren más mercáu nel esterior.
Nes actividaes industriales rellacionaes cola producción d’orixe vexetal hai un númberu eleváu de productos, dende conserves vexetales, zumos, sidre o productos de panadería hasta los piensos pal ganáu.
Nos productos d’orixe animal destaquen les industries cárnicas y lláctees, per delantre d’otros productos como’l miel, güevos, o les conserves de pexe.
