- Fonte: LNE /
El corveranu Berto García publica’l so décimu poemariu, «Cinética». La obra inclúi venti poemes engarraos sobro conceutos opuestos como «Nueche y día».
El corveranu Berto García edita un llibru cada dos años. Empezó a publicar poesía en 2005 y agora tien nes sos manos el so décimu trabayu, «Cinética». Trátase de venti poemes engarraos, diez pareyes d’ocho versos de conceutos opuestos como «Nueche y día», «Dientro y fora» o «Galbana y enfotu». García defende que’l ser humanu, n’ocasiones, apriende’l significáu de los conceutos «basándose nel contrariu», d’ende ese xuego y amás, l’aprendizaxe, defende, «ye en movimientu». En cada poema de cada pareya, unu tresmite «quietú, aselu» y l’otru, «movimientu, cinética».
El nuevu poemariu de Berto García estremase de los anteriores «na forma de presentar» les obres. Defende de la mesma que los poemes son «más maduros» y que’l fechu de tar estremaos en bloques por pareyes supon-y un estímulu» para escribir, y col deséu de que sía «prestoso» para’l llector al tratase d’una manera distinta de presentar los poemes frente a la clásica estructura d’esti tipu d’obres lliteraries.
«Cinética» ta editáu por Cuatro Gotes». La primer presentación va ser «en casa», en Corvera, afirma Berto García. Ta afitada para’l 29 d’abril nel centru sociocultural de Les Vegues. La siguiente va ser en Xixón el 20 de xunu. La obra cunta amás con notes d’otros trés autores. Gonzalo Barreñada ye l’encargáu del prólogu, María Fernández Abril escribió l’epílogu y la contraportada ye un testu de Daniel García Granda. Y esto ye asina porque a Berto García gústa-y cuntar coles visiones d’otros poetes de les sos obres y, esplica, da otres perspectives al llector antes d’enfrentase a la obra.
La producción de versos de Berto García desque empezó a publicar ye alta. «Como los grandes grupos, un discu cada dos años», bromia l’autor de «Cinética», que d’alcuerdu a esi títulu qu’implica movimientu, nun fuelga y yá tien más proyectos. Avanza ensin dar munchos detalles que tien «un poemariu potente» ente manos, amás d’otros proyectos de lliteratura infantil y p’adultos tantu de poesía como de narrativa.
