‘Nun son Ulises’ grabóse, como los otros once temes orixinales del discu, nos Tutu Estudios de Corvera baxo la producción de Sergio Rodríguez. La lletra del cantar naz d’un poema de Marisa López-Diz de Les races del olvidu, la obra cola qu’algamó’l Premiu Teodoro Cuesta en 2015 y qu’asoleyó Ediciones Trabe en 2017.
Despliquen que «ta dedicada a la xente qu’un día tien que dexar el so país, la so llingua y la xente a la que quier, a la gueta d’una vida meyor; falando del dolor de la partida, del desarraigu, de tolo que se dexa pa emprender un viaxe hacia un futuru inciertu».
Mestura entamó la so andadura va venti años pola so pasión poles llingües y les cultures. Publicaron el so primer discu en 2006, Agua del norte, nel que yá presentaron temes n’asturianu, castellán y portugués. Dos años dempués asoleyaron Poemes de carambelu cola editorial Pintar Pintar, un trabayu pa la reciella col que ficieron un llabor didácticu peles escueles asturianes. En 2014 llegó A terra esqueicida, un discu protagonizáu dafechu pola llingua y cultura del Navia-Eo. Va tres años collaboraron col grupu Voces Mansoleas nel álbum Tierra de mansoleas, dedicáu a la xíriga de los zapateros de Pimiango. Amás, participaron en producciones del Institutu Asturianu de la Muyer, el compilatoriu Conceyo de cantares, el Coru de Ribadeva o’l llibru-discu INSTANT.ES. Con Abre la ventana -que va asoleyar en formatu llibru-discu-, van siguir dando pasos na so trayectoria.
