Facer la colada ye una espresión que nos suena castellana, pero lo cierto ye que tien que ver con una tradición mui asturiana. Hasta va non munchos años nun había accesu a dellos productos pa llavar la ropa, unos por caros y otros por nun esistir tovía daquella, polo que la xente d’Asturies tenía qu’apañase pa llavar y desinfectar la ropa.
- semeya /Autor testu: Kike Garamendi
Ún de los problemas más complicaos de solucionar yera’l d’atopar un productu qu’ablanquiare la ropa. Agora tenemos munchos químicos, pero, ¿Qué usaba entós la xente pa llavar la ropa blanco?
La ceniza, bien usada, yera un ablanquiador mui potente. Eso sí, nun valía tou tipu de ceniza, tenía que ser namás de madera. Ún de los cuidaos qu’había que tener yera’l de quitar tolos ciescos que pudiere tener pa que nun tiznaren la ropa blanco. La ceniza del llar diba guardándose pa cuando ficiere falta nun trapín fechu d’un cachu sábana.
La colada solía facese una vez al mes según los testimonios más antiguos y una vez a la selmana según testimonios más modernos. Yera un trabayu duru que llevaba tol día, entós lo que se facía yera dir acumulando tola ropa y cuando había bastante faciase una colada.
Entre los preseos (utensilios) pa facer la colada, tenemos:
• El bogáu: piedra redonda con un cañú pa que pingue’l líquidu que sal de colar la ropa. N’otres zones llámenlo boguéu, bugadeiru, coladoriu o colaer.
• Tina: goxu fechu de blimes nel que se colaba la ropa. Tamién yera mui común usar troncos d’arbol agüecaos. Cola llegada de los bidones de carburu hubo cases onde los usaron a mou de tina faciendo-y unos furacos en culu y poniendo una mecha de tela pa que pingase per ehí
• Sábanu: Sábana blanca y torpe que s’usaba pa cubrir per dientro la tina
• Ceniceru: Cachín de sábana na que se guardaba la ceniza y que facía de colador cuando s’echaba l’agua.
• Cerná/Cernada: Ye’l nome que recibe la ceniza después de moyao
• Calderu o ferrada: El calderu yera de porcelana normalmente, la ferrada yera una especie de calderu fechu de madera y aguantáu per unos aros de fierro.
• Lexía/lixía: Ye’l líquidu que pinga pel cañu del bogáu resultante de la mezcla del agua cola ceniza. Les muyeres alcuérdense del tactu suave del líquidu y que quemaba, polo que-yos recordaba a la lexía comprao.
¿Cómo se colaba la ropa?. Nel procesu de facer la colada había tres pasos:
• Moyar la ropa y enxabonar: lo primero de too yera remoyar la ropa bien y enxabonalo. El xabón nun yera bastante pa quitar les manches, ye polo qu’había que lo colar
• Colada: poníase n’alto’l bogáu pa que pingase pel cañu a un calderu. Enriba’l bogáu poníase la tina que se cubría per dientro col sábanu. Una vez puestu’l sábanu colocábase doblada la ropa enxabonao. Enriba tapábase col ceniceru y después echábase poco a poco l’agua caliente. L’agua que diba pingando al calderu o la ferrada salentábase cada vez un poco más y volvía echase penriba del ceniceru.
• Esclarar: la ropa esclarábase bien nel llavaderu y llevábase pa casa, onde se tendía pelos matos o s’echaba al verde pa que secare, blanqueábase y coyía’l olorín a la yerba.
De les propiedades de la ceniza fálase nos cantares, dícennos:
“Ceniza fai colada y non moza arremamgada»
Hai una copla que recuerden munches muyeres de Villaviciosa, que nos diz como s’echaba l’agua:
– Tres calentines
– Tres calentando
– Tres fervollines
– Y tres fervollando
