- Alborecemos col cielu nuboso na fastera centru-oriental d’Asturies, tando más escampláu na ocidental con unes temperatures que tan alrodiu de los 8ºC, rexistrándose nel puirtu Payares 2,8ºC.
- Güei vamos tener el cielu nuboso con unes temperatures que camudarán poco y vientu sele ya variable.
- Mañana miércoles l’aire ábrigu que pue soplar con fuercia en zones altes de montaña fadrá que suban les temperatures bultablemente con nubosidá media-alta que sedrá más abondosa na fastera surocidental d’Asturies y cordelera.
- El xueves pela tarde entrará dalgo de vientu norte apurriéndonos humedá y nubosidá de tipu baxo que pue dexar dalgo d’orpín con unes temperatures másimes que descenderán llixeramente, mentantu que pela mañana tendremos nubes ya claros o abancios con ambiente primaveral.
- El vienres torna l’aire ábrigu con fuercia con subida de temperatures tanto les mínimes como les másimes, soplando con raches fuertes en zones altes de montaña y apurriéndonos nubes medies y altes sin más consecuencies.
- Paez que’l sábadu podemos tener un frente que mos dexe precipitaciones xeneralizaes y el domingu baxen les temperatures con dalgo de nieve pela cordelera pero esto yá lu diremos viendo.
