- Alborecemos col cielu cubiertu y precipitaciones con unes temperatures que tan alrodiu de los 7ºC, rexistrándose nel puirtu Payares -1,4ºC.
- Güei vamos tener xarabatos intermitentes que sedrán ente febles ya moderaos y de nieve perriba de los 800m, baxando al finar el día hasta los 500-600m. Les temperatures en bultable descensu y l’aire de componente norte con raches moderaes en zones altes ya en puntos del llitoral.
- Mañana vienres vamos tener un día mui asemeyáu con precipitaciones intermitentes que sedrán más abondoses na cordelera y fastera oriental d’Asturies y de nieve ente los 500-700m con unes temperatures que siguen baxando ya col aire de componente norte qu’amenorgará dalgo pa tar sele casi tol día.
- El sábadu alboreceremos con nublines ya borrinos no fonderu los valles que tenderán a dixebrase rápidamente, tando poco nuboso o escampláu pelos altos onde xelará fonderamente. A partir del mediudía aumentará la nubosidá pa dexanos la tarde nuble ya con precipitaciones febles en xeneral que seguirán siendo de nieve en cotes baxes, ente los 500-700m con unes temperatures mínimes en descensu, camudando poco les másimes ya col aire que sedrá sele ya varible.
- El domingu entrá nordés que dirá escamplandu’l cielu pero con ambiente ivernal y sensación térmica baxa por mor del vientu que pue soplar cafiante nel llitoral y zones espuestes.
