Un tributu a la imaxinación y l’interés en solo un minutu. El Comercio viaxa hasta Viena para conocer l’espectáculu ‘Kurios. Gabinete d’Intereses’ del Cirque du Soleil que va llegar a Xixón el 11 de xunetu hasta’l 17 d’agostu.
Asitiada en Neu Marx de Viena con 19 metros d’altu y 51 de diámetru, la carpa del Cirque du Soleil tresporta a los cientos y cientos d’espectadores que s’enfusen nella a una realidá paralela al traviés del so espectáculu ‘Kurios. Gabinete d’Intereses’, onde la palabra imposible esprendese del so significáu. Para comprobalo, El Comercio viaxó hasta la capital austriaca col fin de conocer esti show de primera mano primero que llegue a Xixón, onde va permanecer del 11 de xunetu al 17 d’agostu nel que va ser el so estrenu nacional.
Locomotores, máquines de vapor, gramófonos o turbines. So la estética de ‘steampunk’ l’escenariu introduz al públicu nel entamu de la Revolución Industrial, concretamente nun gabinete d’intereses d’un científicu onde nada ye lo que paez. A los once y once, hora local del gabinete, les lluces apáguense y una locomotora de vapor –de más de 100 quilos– apaez dando empiezu a l’actuación. D’ella salen personaxes de lo más particulares: un home acordión, una especie d’Obélix mecánicu o una muyer qu’emula un telégrafu. Al traviés d’una música animada y una coreografía que destila allegría polos cuatro costaos, l’elencu presenta al espectador la esencia de lo que ye ‘Kurios’.
