La Central hidroeléctrica de Salime

¿Pue una central hidroeléctrica cuntar una hestoria épica? La de Salime non solo xenera enerxía: la so sala de turbines alluga un mural monumental que narra l’esfuerzu humano y artístico tres la so construcción. Afaya la hestoria de los sos murales. El monumental aprovechamientu hidroeléctricu de Salime, construyíu ente los años 1945 y 1955, ye xuna sobeyosa manifestación del llabor integrador desenvuelta por Joaquín Vaquero Palacios en collaboración col so fíu Joaquín Vaquero Turcios.

Na sala de turbines de la Central de Salime atopamos dos de les intervenciones más interesantes: xuna composición xeométrica que reproduz la descarga eléctrica ente dos polos y un gran frisu narrativu que da cuenta de l’aballadora esperiencia constructiva del saltu. La composición, a gran escala, esixe xuna llectura continua para aprehender el relatu, la narración de los trabayos entamaos dende la xénesis del proyectu hasta llegar a les aplicaciones de la eletricidá y de los sos protagonistes.

El relatu plásticu arrinca cola invención del Saltu y la representación de los Conseyeros de les empreses promotores -Hidroeléctrica del Cantábricu S.A. y Electra de Viesgo, S.A.- lo mesmo que de los Inxenieros responsables de los estudios técnicos. A la síntesis de los trabayos constructivos -accesos, tresporte y edificios– siguen los Obreros, protagonistes del tramu central del mural; sobrevuéla-yos la escena de la Pietá, na que xuna muyer apesadumbrada sostien ente los sos brazos a un obreru, n’alcordanza de los finaos mientres les obres. Siguen el relatu los  Directores y los Artistes: el padre, Vaqueru Palacios, representáu como escultor; el fíu, Vaqueru Turcios, como pintor.

Más palantre, al pie de l’alusión a la embalsiadura y el fundimientu de les finques y edificios presistentes, son esquemáticamente reproducíos los elementos qu’integren el saltu: la presa, l’alliviaderu, la central, la subestación d’abertal, los grupos de turbina-alternador, los mandos y el tresformador. Remata’l mural col encendíu d’una bombilla y la producción de la enerxía, el calor, la fuerza, la lluz y les sos llínees de tresporte.

La resultancia ye xuna obra atayante y equilibrada na que queden armónicamente acompasaos verismo y simbolismu. El tratamientu dignu, severu y solemne de les monumentales figures, de porte épicu, la rotundidá plástica, la vivacidá cromática ya intensidá emotiva dexen enllazánoslo coles composiciones del muralismu mexicanu.