La icónica artista xaponesa Yayoi Kusama tien un pequenu universu en Grau: asina ye’l llenzu inmersivu que la homenaxa. El colexu públicu Bernardo Gurdiel desenvuelve «Españate», un innovador proyectu que revoluciona «la forma en que los sos alumnos y alumnes esperimenten y comparten l’arte».
Yayoi Kusama ye una figura fundamental nel arte contemporaneo, conocida mundialmente poles sos instalaciones inmersives, les sos escultures y les sos pintures, toes elles trescalaes de llunares, el so motivu característicu.
Para Kusama, los llunares representen l’infinitu, la conexón ente los individuos y l’universu, espliquen dende la dirección del colexu públicu Bernardo Gurdiel, de Grau, una referencia polos sos diversu programes y qu’agora ta revolucionando «la forma en que los sos alumnos y alumnes esperimenten y comparten l’arte». Unu de los sos proyectos en marcha ye «Españate», iniciativa innovadora que toma diverses disciplines artístiques y esquiza la obra de ceadores influyentes.
Xuna de les creaciones d’Españate» foi’l tresformamientu d’un pasiellu del colexu en «un llenzu inmersivu», anubiertu de llunares de colores. La instalación «ye un vibrante homenaxe a la icónica artista xaponesa Yayoi Kusama, que’l so trabayu tescendió fronteres cola so singular obsesión polos puntos y les sos esploraciones del infinitu».
«La instalación del pasiellu blancu llenu de llunares busca introducir a los neños y neñes y a les families nesti universu singular. Al somorguiase nesti espaciu, convidalos a la reflexón sobro conceutos como la repetición, l’infinitu y nuesa mesma esistencia dientro d’un cosmos vastu. La elección del blancu como fondu resalta entá más la omnipresencia de los llunares, creando xuna esperiencia visual atanante», señala’l director del colexu, Marco González.
«Al traviés d’esti proyectu búscase fomentar la creatividá y l’espresión artística averando l’arte al traviés de la esperiencia, pa desenvolver habilidaes al traviés d’un trabayu colaborativu que nos dexe conectar l’arte cola redolada»
El proyectu «Españate» va siguir espandiéndose, cola creación de nuevos espacios y obres inspiraes n’otros artistes y corrientes artístiques. La culminación d’esta iniciativa va ser una visita empuesta bien especial, onde los mesmos alumnos y alumnes van compartir les sos conocencies y la so pasión pol arte coles sos families, ufiertando una perspectiva única y personal de cada creación.
