El Centru Asturianu d’Uviéu proclamóse campeón de la Lliga Sub 17 Femenina de hockey patinos, pero les sos xugadores nun van poder allegar al sector nacional porque nun lleguen a la edá mínima. Demasiáu bones, pero demasiáu moces.
Fonte: El Comercio /
Les integrantes del conxuntu uvieín, dirixíes por Juan Carlos Rodríguez, aunieron los sos ambiciosos espíritos para vencer a tolos rivales, sacante dos, que los sos partíos saldaron con un empate y una derrota. ¿La resultancia?
Proclamáronse campeones de la categoría a falta d’una xornada, la de la próxima fin de selmana, que les enfrentará al Telecable na pista xixonesa de L’Algodonera. ¿El problema? Nun van poder esfrutar del so premiu, que nun ye otru qu’allegar al sector clasificatoriu que se va apostar en La Coruña, previu al Campeonatu d’España de la categoría, porque, magar conquistar la corona, son, a xuiciu de la Federación Española d’hockey patinos, demasiáu pequenes.
«Si enriba de ser más pequenes que’l restu de rivales, ganen, creo que se merecieron el derechu a dir». Nun lo diz cualesquier. Les palabres pertenecen al director deportivu del Centru Asturianu d’Uviéu, Ramón Peralta, el que fuera entrenador del Telecable de Natasha Llee, Sara Lolo, Marta Piquero y compañía, col que conquistó cuatro títulos na mesma temporada. «Nun ye nada que nun supiéramos, pero teníamos la esperanza de que tres ganándolo na pista…».
Normativa clara. La Federación Española ye clara. El reglamentu indica que pueden asistir xugadores nacíes en 2008 y 2009 y un máximu de cuatro xugadores nacíes en 2010 y 2011. El problema ye que Leyre Rodríguez, Noa Salas, Julia Fernández, Sara Carreño, Adriana Marqués y Ángela Candanedo, a les que se xune Celia Álvarez como venceyada, yá que pertenez a otru club, al Uviéu Booling Club, son toes elles nacíes ente 2010 y 2011. «Ye un pocu inxustu, ¿non? Allabamos que Carlos Alcaraz empezara con 17 años, que Lamine Yamal debutara con 15… Nun s’entiende enforma… Les nueses xugadores ganáronse’l respetu de toos entá siendo más pequenes», llaméntase Ramón Peralta. «Elles fixeron el so trabayu y a la fin ye una tema alministrativa, que nun les dexen xugar», añede.
Les sos cifres asuntan: 82 goles a favor y solo 20 en contra, cunten cola ‘Pichichi’ de la categoría, que lleva 41 goles, 11 más que la so persiguidora… Amás de que l’equipu del Centru Asturianu d’Uviéu nun pueda lluchar pol títulu nacional, a lo que se suma l’arrenunciu del Patinalón, esta situación va faer qu’haya un representante asturianu menos nel sector.
