Esti día, 4 d’abril, tuvi la oportunidá de comparecer, con bien d’otros expertos, na Xunta Xeneral pa dar la nuestra opinión, nel mio casu como empresariu, nel proyectu de reforma del Estatutu d’Autonomía pa procurar la oficialidá de les llingües d’Asturies.Nesti cachu falo de la voluntariedá.
Entrevista con Inaciu Iglesias , CEO Cartonaxes VIR
- Entrevista Asturtic/
¿Quién ye Inaciu Iglesias y cómo nació Cartonaxes VIR? Soi empresariu, confíesolo; y de tercer xeneración: esa que, según el tópicu, funde los negocios familiares. Anque Cartonaxes VIR paez que s’aguanta. Va munchos años, en 1932, un dependiente de comerciu y una caxera y maestra d’escuela decidieron fabricar artesanalmente les sos primeres caxes de cartón y convertise asina n’industriales independientes. Yeren los mios güelos: Julieta Vincelle Argüelles y Vicente Iglesias Rodríguez, VIR.
La dixitalización tresformó munchos sectores. ¿Cómo influyó nesti sector y na xestión de la empresa? Ordenando y poniendo rigor. Nós diseñamos, fabricamos y apurrimos más de doscientes mil caxes, acaldía. Son munches operaciones, millones de datos. Y eso ensin métodu resulta imposible. La dixitalización ayúdanos, a nós y a tol sector, a consiguir qu’un productu tan humilde como’l cartón resulte fiable, trazable y competitivu.
¿Cuálos son los principales desafíos a los que s’enfrenta anguaño la industria del cartón n’España y cómo afecten a Cartonaxes Vir? Inventar soluciones estétiques, hixéniques y práctiques que dexen a los nuesos veceros vender meyor los sos productos. En tiempu y forma, ese ye’l retu. Ensin desperdiciar recursos, fadiando lo menos posible y apurriendo valor. El bon pañu nun se viende na arca y esa ye la nuesa misión: arrexuntar, protexer, tresportar y vender; al serviciu de los nuesos veceros.
¿Qué importancia tien para Cartonaxes VIR tar allugada n’Asturies? ¿Creen que la rexón ufierta oportunidaes para’l sector? Somos asturianos de nación y de vocación: nacimos nesta tierra y equí queremos siguir. La familia propietaria ye asturiana; los nuesos veceros más importantes tán equí; munchos de los nuesos provisores tamién; tenemos los meyores trabayadores; y una redolada social correctu y cómpliz. Ameyorable, poques gracies, pero llenu d’oportunidaes; y yá ta bien de centranos, como asturianos, solo no negativo: si queremos, podemos convertir la nuesa tierra nun paraísu tamién empresarial.
¿Cómo valora’l panorama del emprendimiento n’Asturies y qué oportunidaes y desafíos atopa para les nueves empreses? Tenemos que creenos lo más. Y asumir riesgos. Si yo fuera’l gobiernu escucharía más a los empresarios y pondríame a la so disposición, harmonizando y simplificando impuestos. Y si fuera empresariu que lo soi, escucharía a los mios veceros y pondríame a la so disposición; por casu, inventando más soluciones económiques, curioses y sostenibles.
¿Qué papel xuega la sostenibilidá en Cartonaxes VIR y qué midíes implementaron p’afaese a les nueves esixencies medioambientales? Usar papeles cien per cien reciclables, reciclaos y compostables; imprimir con tintes a l’agua; embrivir consumos; optimizar tresportes; calcular la buelga de carbonu; ecu-diseñar los productos; garantizar les nueses materies primes; diversificar les nueses fontes d’enerxía; aplicar la responsabilidá corporativa; y ser conscientes del planeta nel que vivimos.
¿Cuálos son los sos planes de futuru pa la empresa y cómo ven la evolución del sector nos próximos años? Tenemos que siguir modernizando les nueses instalaciones, procesos y maquinaria pa garantizar a toos nuesos veceros un serviciu escelente, en calidá y cantidá. Nun ye fácil. Va costar dineru, compromisu y esfuerzu. Pero creo que disponemos del meyor forno humanu y l’ambición necesaria pa cumplir con tou esto y con más. En siete años vamos llegar a centenarios y siguimos pensando que’l cartón merez enforma la pena. Por nós nun va quedar.
